នៅថ្ងៃសុក្រនេះ ក្រុមគ្រួសារ និងមិត្តភ័ក្តិមនុស្សបាត់ខ្លួន ក្រោយទឹកជំនន់នៅភាគខាងកើតកោះតៃវ៉ាន់ អន្ទះសាររង់ចាំដំណឹងសាច់ញាតិមនុស្សជាទីស្រលាញ់របស់ពួកគេ ក្រោយភ្លៀងធ្លាក់ខ្លាំងបង្កឡើងដោយសារព្យុះទីហ្វុង Ragasa ស្របពេលដែលកិច្ចខិតខំជួយសង្រ្គោះ កំពុងបន្ត ។

ក្រុមអាជ្ញាធរ និយាយថា មនុស្ស ១៤នាក់ បានស្លាប់ និងមនុស្ស ១១នាក់ផ្សេងទៀត កំពុងបាត់ខ្លួន ។

លោក Hwangដែលត្រូវជាប្អូនប្រុសស្រ្តីបាត់ខ្លួននិយាយថា បងស្រីរបស់លោក នៅក្នុងផ្ទះរបស់គាត់ ពេលដែលទឹកជំនន់កើតមាន ។ កូនប្រសាររបស់គាត់ បានប្រថុយចាកចេញ ហើយពេលទឹកស្រក បងស្រីរបស់លោកមិនបានព្យាយាមចាកចេញនោះទេ រហូតដល់ទឹកឡើងដល់ត្រឹមចង្កេះរបស់គាត់ ។ ដូច្នេះហើយគាត់ស្លាប់ក្នុងផ្ទះ ដោយសារវាពេញដោយភក់ ហើយគ្មានមធ្យោបាយនាំគាត់ចេញនោះទេ 

លោកបន្តថា ពួកយើងទូរស័ព្ទហៅនគរបាល ប៉ុន្តែពេលពួកគេមកដល់ អ្វីៗបានជន់លិចម្តងទៀត ហើយនិងគ្មានវិធីនាំបងស្រីរបស់គាត់ចេញពីផ្ទះបាននោះឡើយ ។

ព្យុះ Ragasa បាននាំមកនូវភ្លៀងធ្លាក់ខ្លាំងនៅស្រុក Hualien កោះតៃវ៉ាន់ នាសប្តាហ៍នេះ បណ្តាលឲ្យបឹងនៅតាមតំបន់ភ្នំហូរប្រៀបច្រាំង និងធ្វើឲ្យមានទឹកជន់នៅទីក្រុងតូច Guangfu ។ កិច្ចខិតខំជួយសង្រ្គោះ កំពុងបន្តនៅទីក្រុងមួយនេះ ខណៈជំនួយត្រូវបានចែកចាយដល់ពលរដ្ឋរងផលប៉ះពាល់ ៕