ប្រធានាធិបតីសហរដ្ឋអាមេរិកលោក Donald Trump និយាយកាលពីថ្ងៃព្រហស្បតិ៍ថា អ៊ុយក្រែនមានឱកាសមួយ ក្នុងការទទួលបានទឹកដីរបស់ខ្លួនមកវិញ ។

លោកនិយាយប្រាប់ក្រុមអ្នកសារព័ត៌មានថា ពួកគេនឹងព្យាយាម លោកកំពុងមើលវិធីរបស់រុស្ស៊ី ហើយនិងអ្វីដែលរុស្ស៊ីកំពុងធ្វើ ។ លោកពុំពេញចិត្តទាល់តែសោះចំពោះអ្វីដែលរុស្ស៊ីកំពុងធ្វើ និងអ្វីដែលលោកប្រធានាធិបតី Putin កំពុងធ្វើ ។

លោកបន្តថា លោកមិនចូលចិត្តវាទាល់តែសោះ ។ គាត់កំពុងសម្លាប់មនុស្សដោយគ្មានហេតុផលអ្វីទាំងអស់ ។ ពួកគេទម្លាក់គ្រាប់បែកគ្រប់កន្លែង ហើយពួកគេដណ្តើមបានទឹកដីតិចតួចប៉ុណ្ណោះ បើមាន ។ 

លោក Trump បញ្ជាក់ទៀតថា ការពិតណាស់ថា ពួកគេនឹងបាត់បង់ទឹកដីមួយចំនួន ដូច្នេះហើយលោកគិតថា វាពិតជាអាក្រក់ខ្លាំងណាស់សម្រាប់កេរ្តិ៍ឈ្មោះរបស់រុស្ស៊ី ។ សង្រ្គាមមួយនេះ គួរតែកន្លងផុត បើសិននេះជាសង្រ្គាមរបស់ពួកយើងវិញ ពួកយើងនឹងឲ្យវាកន្លងហួសក្នុងរយៈពេល ១សប្តាហ៍ ។

ខណៈពេលនោះដែរ ប្រធានាធិបតីអ៊ុយក្រែន លោក Volodymyr Zelenskyy បានព្រមានថា វិមានក្រឹមឡាំង នឹងក្លាយជាគោលដៅ ហើយមន្ត្រីរុស្ស៊ី គួរតែពិនិត្យមើលកន្លែងជ្រកការពារពីការទម្លាក់គ្រាប់បែក ប្រសិនបើទីក្រុងមូស្គូ មិនបញ្ឈប់ការលុកលុយប្រទេសរបស់ខ្លួននោះទេ ៕