រូបភាពវីដេអូឃ្លីបពីប្រជុំកោះ Azores ឃើញស្ថានភាពមហាសមុទ្រកើតមានព្យុះកាលពីថ្ងៃព្រហស្បតិ៍ និងថ្ងៃសុក្រនេះ មុនការមកដល់របស់ព្យុះស៊ីក្លូន Gabrielle ។

កម្មភាពកម្សាន្តទាំងអស់ ត្រូវបានលុបចោលរយៈពេល ២៤ម៉ោង ខណៈសាលារៀន និងសេវាកម្មសាធារណៈ ត្រូវបានបិទទ្វារ កាលពីថ្ងៃព្រហស្បតិ៍ ក្នុងនោះក្រុមអាជ្ញាធរជំរុញឲ្យពលរដ្ឋបន្តស្នាក់នៅក្នុងផ្ទះ មុនការមកដល់របស់ព្យុះស៊ីក្លូន Gabrielle ។

ទីភ្នាក់ងារឧតុនិយម IPMA បានដាក់ប្រជុំកោះ Azores ស្ថិតក្នុងការប្រកាសអាសន្នកម្រិតពណ៌ក្រហមដែលជាកម្រិតគ្រោះថ្នាក់ខ្លាំងបំផុត ។

យោងតាមការអះអាងរបស់ទីភ្នាក់ងារ IPMA បានឲ្យដឹងថា ព្យុះកំណាចនេះដែលបោកបក់ក្នុងល្បឿនចន្លោះ ១៣០គ.ម ទៅ ២០០គ.ម ក្នុង ១ម៉ោង ទំនងជាវាយប្រហារកោះចំនួន ៧ ក្នុងចំណោមកោះទាំង ៩នៃប្រជុំកោះ Azores ស្ថិតក្នុងមហាសមុទ្រអាត្លង់ទិក ហើយនិងអាចធ្វើឲ្យរលកសមុទ្រមានកម្ពស់រហូតដល់ ១៨ម៉ែត្រ ៕