នៅថ្ងៃសុក្រនេះ អ៊ីស្រាអែល បានបើកឡើងវិញច្រកព្រំដែនឆ្លងកាត់ សម្រាប់តែអ្នកដំណើរធ្វើចរាចរណ៍មួយប៉ុណ្ណោះ នៅតំបន់កាន់កាប់វ៉េសប៊ែងជាមួយហ៊្សកដានី ។

អ៊ីស្រាអែលបានបិទច្រកព្រំដែនឆ្លងកាត់ Allenby កាលពីថ្ងៃសុក្រសប្តាហ៍មុន ក្រោយអ្នកបើកបររថយន្តម្នាក់ ដឹកជំនួយមនុស្សធម៌ពីហ៊្សកដានីសម្រាប់តំបន់ហ្កាហ្សា បើកការបាញ់ប្រហារសម្លាប់ទាហានអ៊ីស្រាអែល ២នាក់នៅទីនោះ ។ ក្រោយបើកមួយភ្លែតកាលពីថ្ងៃចន្ទ អ៊ីស្រាអែលបានបិទទៅវិញ សម្រាប់ពេលវេលាមិនច្បាស់លាស់ ។

ច្រកព្រំដែនដែលគេស្គាល់ថាជាច្រកឆ្លងកាត់ Karama ដែរនោះ បានក្លាយជាផ្លូវដ៏សំខាន់មួយសម្រាប់ជនប៉ាឡេស្ទីននៅតំបន់វ៉េសប៊ែងដែលធ្វើដំណើរទៅកាន់បរទេស ហើយត្រូវបានប្រើប្រាស់ដោយរថយន្តដឹកទំនិញពាណិជ្ជកម្មរវាងហ៊្សកដានី និងតំបន់វ៉េសប៊ែង ។

រថយន្តបានប្រើប្រាស់ច្រកមួយនេះដឹកជំនួយទៅកាន់តំបន់ហ្កាហ្សា ហើយរថយន្តទាំងនោះ មិនអាចឆ្លងកាត់បានទៀតទេ ក្រោមបទបញ្ជាបច្ចុប្បន្ន ។

អង្គការសហប្រជាជាតិ(UN) និយាយថា ច្រកឆ្លងកាត់មួយនេះ គឺជាផ្លូវដ៏សំខាន់មួយសម្រាប់ការនាំស្បៀងអាហារ សំពត់តង់ និងទំនិញផ្សេងទៀតចូលទៅក្នុងតំបន់ហ្កាហ្សា ហើយការបិទច្រកមួយនេះ អាចនឹងមានផលប៉ះពាល់យ៉ាងខ្លាំងមួយដល់លទ្ធភាពរៀបចំជំនួយ ដើម្បីឆ្លើយតបវិបត្តិមនុស្សធម៌នៅទីនោះ ៕