មន្ត្រីក្រសួងពាណិជ្ជកម្មម៉ាឡេស៊ី នៅថ្ងៃសុក្រ (ទី២៦ ខែកញ្ញា) នេះ បានប្រាប់ឲ្យដឹងថា ប្រទេសម៉ាឡេស៊ីបានស្នើឲ្យសហរដ្ឋអាមេរិកពិចារណា លើការដាក់អត្រាពន្ធសូន្យ សម្រាប់ការនាំចេញគ្រឿងសង្ហារិម យានយន្ត និងផលិតផលផ្នែកអាកាសរបស់ខ្លួន។

ដោយបញ្ជាក់ពីរបាយការណ៍មុនរបស់ទីភ្នាក់ងារសារព័ត៌មានរដ្ឋ Bernama  មន្ត្រីបានប្រាប់សារព័ត៌មានរ៉យទ័រថា ទីក្រុងក្រុងវ៉ាស៊ីនតោនក៏បានយល់ព្រមពិចារណាផ្តល់ការលើកលែងពន្ធដល់ប្រទេសម៉ាឡេស៊ីផងដែរ សម្រាប់ទំនិញដែលមិនបានផលិត នៅសហរដ្ឋអាមេរិក ដែលរួមមានទាំងកាកាវ និងប្រេងដូង ដោយការសម្រេចមួយត្រូវបានរំពឹងថា នឹងបញ្ចប់នៅខែតុលា។

គួរបញ្ជាក់ថា កាលពីថ្ងៃទី២៥ ខែកញ្ញា ប្រធានាធិបតីអាមេរិកលោក Donald Trump បានប្រកាសនូវជុំថ្មីនៃអត្រាពន្ធ ដែលដាក់លើទំនិញនាំចូល ក្នុងនោះរួមមានទាំង ៥០ភាគរយ លើទូផ្ទះបាយនាំចូល និងសម្ភារៈបន្ទប់ទឹក ហើយ ៣០ភាគរយលើគ្រឿងសង្ហារិមតុបតែងលម្អ។

ម៉ាឡេស៊ី និងសហរដ្ឋអាមេរិកកំពុងស្វែងរកការបញ្ចប់កិច្ចព្រមព្រៀង ស្តីពីពន្ធគយ បន្ទាប់ពីទីក្រុងវ៉ាស៊ីនតោន បានដាក់ពន្ធលើការនាំចូលរបស់ម៉ាឡេស៊ី ១៩ភាគរយ នៅក្នុងខែសីហា។

នៅលើបណ្ដាញសង្គម Facebook កាលពីថ្ងៃទី២៥ ខែកញ្ញា នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា ប្រទេសនានាកំពុងកំណត់គោលដៅឲ្យមានកិច្ចព្រមព្រៀង មុនពេលដំណើរទស្សនកិច្ចដែលបានគ្រោងទុកនៅខែតុលា ដោយលោក Trump ទៅកាន់ទីក្រុងគូឡាឡាំពួ សម្រាប់កិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍៕