​អាមេរិក៖ មន្ត្រី​ជាន់ខ្ពស់​មួយ​រូប​របស់​សហរដ្ឋ​អាមេរិកបាន​និយាយ​កាលពី​ថ្ងៃអាទិត្យ​ថា សហរដ្ឋអាមេរិក​ព្រួយបារម្ភ​ថា​ ការ​បាញ់សាក​ល្បង​មី​ស៊ី​ល​កាន់​តែ​ច្រើន​របស់​កូរ៉េខាងជើង អាច​ត្រឡប់​ទៅ​រក​ការ​បាញ់សាកល្បង​អាវុធ​នុយក្លេអ៊ែរ និង​មី​ស៊ី​ល​អន្តរទ្វីប​បាលី​ស្ទីក​ឡើងវិញ ខណៈ​កំពុង​ជំរុញ​ក្រុង​ព្យុងយ៉ាង​ឲ្យ​ចូលរួម​ចរចា​ដោយ​ផ្ទាល់ដោយ​គ្មាន​បុរេ​លក្ខខ័ណ្ឌ​។​

​កូរ៉េខាងជើងបាន​បាញ់​សាកល្បង​មី​ស៊ី​ល​ដ៏​ធំ​បំផុត​របស់​ខ្លួន​ចាប់​តាំង​ពី​ឆ្នាំ២០១៧​ កាលពី​ថ្ងៃអាទិត្យ ដែល​ធ្វើ​ឲ្យ​មានការ​សហ​សង្ស័យ​ថា ​ មី​ស៊ី​ល​ដែល​កំពុង​ហោះ​ឡើង​យ៉ាង​ខ្ពស់​ទៅលើ​អាកាស​គឺជា​មី​ស៊ី​ល​បាលី​ស្ទីក​រយៈ​ចម្ងាយ​មធ្យម​។​ ​ប្រធានាធិបតី​កូរ៉េខាងត្បូងលោក Moon Jae-in បាន​និយាយ​ថា​ ការសាកល្បង​មី​ស៊ី​ល​ដ៏​ច្រើន​បំផុត​នាពេល​ថ្មីៗ​នេះ បានធ្វើ​ឲ្យ​គេ​នឹកឃើញ​ដល់​ភាព​តានតឹង​យ៉ាង​ខ្លាំង​កាលពី​ឆ្នាំ២០១៧​ នៅ​ពេល​ដែល​កូរ៉េ​ខា​ជើងបាន​សាកល្បង​នុយក្លេអ៊ែរ​ជាច្រើនលើក និង​បាន​បាញ់​មី​ស៊ី​ល​ដ៏​ធំ​បំផុត​របស់ខ្លួន​។ ​លោក​ថា ការបាញ់​ចុងក្រោយ​នេះបានធ្វើ​ឲ្យ​កូរ៉េខាងជើង​ខិត​ទៅ​កាន់តែ​ជិត​ ទៅរក​ការបាញ់​សាកល្បង​មី​ស៊ី​ល​បាលី​ស្ទីក​អន្តរទ្វីប​រយៈ​ចំងាយ​ឆ្ងាយ​បំផុត​របស់ខ្លួន ICBMs ដែល​បាន​ផ្អាក​ចាប់តាំងពី​ឆ្នាំ២០១៧ មក​។​

​ក្រោម​ការដឹកនាំ​របស់​ប្រធានាធិបតី​លោក Joe Biden ក្រុង Washington បាន​ស្វែងរក​ការចរចា​ម្ដង​ហើយ​ម្ដងទៀតជាមួយ​កូរ៉េខាងជើង ប៉ុន្តែ​ប្រទេស​នេះ​បាន​ច្រានចោល​។ មេដឹកនាំ​កូរ៉េខាងជើងលោក Kim Jong Un បាន​ជួបចរចា​ចំនួន​ ៣​លើកជាមួយ​អតីត​ប្រធានាធិបតី មុន​លោក ​Biden គឺ​លោក Donald Trump យ៉ាងណា​ជំនួប​ទាំងនោះមិន​បាន​ឈានដល់​ការទាមទារ​របស់លោក Kim សម្រាប់​ការដក​ទណ្ឌកម្ម​ចេញពី​ក្រុង​ព្យុងយ៉ាង​នោះទេ​៕

អត្ថបទ៖ សុខមាន