ក្រុមអ្នកតវ៉ាគាំទ្រប៉ាឡេស្ទីនរាប់ពាន់នាក់បានបិទចរាចរណ៍នៅជិតទីលាន Times Square ក្នុងទីក្រុងញូវយ៉កកាលពីថ្ងៃសុក្រ ទី២៦ ខែកញ្ញា អំពាវនាវឱ្យនាយករដ្ឋមន្ត្រីអ៊ីស្រាអែល លោក Benjamin Netanyahu «បញ្ឈប់អំពើប្រល័យពូជសាសន៍» នៅក្នុងតំបន់ហ្កាហ្សា។ ក្រុមបាតុករគាំទ្រប៉ាឡេស្ទីនរាប់រយនាក់បានក៏ប្រមូលផ្តុំគ្នានៅ Dag Hammarskjold Plaza នៅក្បែរអង្គការសហប្រជាជាតិ ដោយគ្រវីទង់ជាតិប៉ាឡេស្ទីន និងចោទប្រកាន់អ៊ីស្រាអែល និងអ្នកគាំទ្ររបស់ខ្លួនគឺសហរដ្ឋអាមេរិក ពីបទប្រព្រឹត្តអំពើប្រល័យពូជសាសន៍នៅហ្កាហ្សា។ រដ្ឋាភិបាលស្តាំនិយមជ្រុលក្នុងប្រវត្តិសាស្ត្រប្រទេសអ៊ីស្រាអែល បានធ្វើសេចក្តីប្រកាសខ្លាំងបំផុតក្នុងរយៈពេលប៉ុន្មានឆ្នាំមកនេះថា នឹងគ្មានរដ្ឋប៉ាឡេស្ទីនឡើយ ខណៈខ្លួនកំពុងបន្តប្រយុទ្ធជាមួយក្រុមហាម៉ាស បន្ទាប់ពីក្រុមសកម្មប្រយុទ្ធនេះកាលពីថ្ងៃទី៧ ខែតុលា ឆ្នាំ២០២៣ បានសម្រុកវាយលុកទៅលើអ៊ីស្រាអែល។ លោក Netanyahu ស្ថិតនៅក្នុងទីក្រុងញូវយ៉ក ដើម្បីថ្លែងសុន្ទរកថាទៅកាន់មហាសន្និបាតអង្គការសហប្រជាជាតិកាលពីថ្ងៃសុក្រ ខណៈប្រធានាធិបតីសហរដ្ឋអាមេរិក លោក Donald Trump បានបន្តកិច្ចព្រមព្រៀងដើម្បីបញ្ចប់សង្រ្គាមនៅតំបន់ហ្កាហ្សា។ នាយករដ្ឋមន្ត្រីអ៊ីស្រាអែល លោក Benjamin Netanyahu បានថ្លែងដោយផ្ទាល់ទៅកាន់ចំណាប់ខ្មាំង ដោយការចាក់ផ្សាយសុន្ទរកថារបស់លោកនៅឯមហាសន្និបាតអង្គការសហប្រជាជាតិកាលពីថ្ងៃសុក្រតាមរយៈឧបករណ៍បំពងសំឡេង ដាក់នៅឯព្រំដែនតំបន់ហ្កាហ្សា។ ជាមួយគ្នានេះ គ្រួសារចំណាប់ខ្មាំងអ៊ីស្រាអែលដែលត្រូវបានឃុំខ្លួននៅហ្កាហ្សាបានអំពាវនាវឱ្យនាយករដ្ឋមន្ត្រីអ៊ីស្រាអែល លោក Benjamin Netanyahu ឈានដល់កិច្ចព្រមព្រៀងជាមួយក្រុមហាម៉ាសដើម្បីបញ្ចប់សង្គ្រាមនិងដោះលែងអ្នកជាប់ឃុំដែលនៅសល់កាលពីថ្ងៃសុក្រ ទី២៦ ខែកញ្ញា នៅជិតអង្គការសហប្រជាជាតិក្នុងទីក្រុងញូវយ៉ក។ ក្រុមអ្នកតវ៉ាបានគ្រវីទង់ជាតិអ៊ីស្រាអែល កាន់រូបថតចំណាប់ខ្មាំង ហើយបានស្រែកថា «នាំពួកគេទៅកាន់លំនៅឋានវិញ»។