ភ្នំពេញ ៖ គិតត្រឹមថ្ងៃទី២៧ ខែកញ្ញានេះ គឺជាថ្ងៃទី២ នៃការរៀបចំកម្មវិធីពិព័រណ៍ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួមជំរុញ និងគាំទ្រផលិតផលក្នុងស្រុក» ។ ជាមួយនេះ ក្រុមអាជីវករ បានប្រាប់ឱ្យដឹងថា ពិតជាសប្បាយចិត្តខ្លាំងណាស់ ដោយសារមានការចូលរួមទស្សនាយ៉ាងច្រើនកុះករពីសំណាក់ប្រជាពលរដ្ឋ និងលក់ដាច់អស់ច្រើនគ្រប់មុខទំនិញ។

​អ្នកស្រី ហោ សុគន្ធា អាជីវករលក់ខាងផ្នែកចំណីម្ហូបអាហារ បានឱ្យព័ត៍មាន ប៊ីធីវី ដឹងថា ចាប់តាំងពីការចូលរួមរៀបចំដាក់តាំងលក់ផលិតផលក្នុងកម្មវិធីជាច្រើនកន្លងមក សម្រាប់កម្មវិធីពិព័រណ៍ផលិតផលខ្មែរនេះ ពិតជាមើលឃើញថា ក្រៅពីមានអ្នកដើរទស្សនាយ៉ាងច្រើនកក់កុញ នៅពេលដែលចាកចេញទៅត្រឡប់ទៅផ្ទះវិញ គឺមានការយួរឥវ៉ាន់ស្ទើរតែគ្រប់ៗគ្នា ដែលធ្វើឱ្យអាជីវករទាំងឡាយមានការសប្បាយចិត្ត ដោយសារមិននឹកស្មានថា មានការគាំទ្រជាខ្លាំងពីប្រជាពលរដ្ឋខ្មែរ។

លោក ស៊ុក ស៊ីវត្ថា អាជីវករខាងផ្នែកអាហារកែច្នៃ នៃសហគ្រាស រីងហ្គាខេម បានឱ្យដឹង ប៊ីធីវី ដឹងដែរថា គិតក្នុងថ្ងៃទី១ នៃកម្មវិធីពិព័រណ៍នេះ ផលិតផលរបស់ខ្មែរស្ទើរតែគ្រប់វិស័យ គឺមានកាគាំទ្រនិងចាប់អារម្មណ៍ច្រើនពីអ្នកដើរទស្សនា ដោយសារការយល់ដឹងក្នុងការផលិតផលិតផលដែលផ្តោតលើគុណភាព និងស្តង់ដារ។ ជាពិសេសទទួលបានការណែនាំ និងគាំទ្រនានា ពីមន្រ្តីជំនាញរបស់រដ្ឋាភិបាល ទើបធ្វើឲ្យផលិតផលខ្មែរ កាន់តែមានទីផ្សារច្រើនជាងមុន។ លោក បានបន្តថា ពិតជារំភើប និងសប្បាយចិត្តណាស់ ពេលដែលផលិតផលជាតិ មានការគាំទ្រជាហូហែរបែបនេះ និងសំណូមពរបន្ថែមថា សូមឱ្យប្រជាពលរដ្ឋខ្មែរទាំងអស់ បន្តជួយគាំទ្រផលិតផលក្នុងស្រុកឲ្យបានច្រើនជាងផលិតផលដែលនាំចូល ដើម្បីផ្តល់ជាកម្លាំងចិត្តដល់ផលិតករ និងជួយលើកស្ទួយកុំឲ្យប្រជាជនចំណាកស្រុកជាដើម។

 ពិព័រណ៍ផលិតផលខ្មែរ ដែលរៀបចំឡើងដោយសហភាពសហព័ន្ធយុវជនកម្ពុជា នេះ មានរយៈពេល៣ថ្ងៃ ចាប់ពីថ្ងៃទី២៦ ដល់២៨ ខែកញ្ញា ឆ្នាំ២០២៥ នៅសាលពិព័រណ៍កោះពេជ្រ ក្នុងគោលដៅដើម្បីជំរុញការគាំទ្រផលិតខ្មែរ បង្ហាញទៅកាន់ប្រជាពលរដ្ឋខ្មែរឱ្យបានដឹងពីអ្វីដែលកម្ពុជាបាននឹងកំពុងផលិតបាន។ លើសពីនេះ ដើម្បីបង្ហាញពីការរួបរួមសាមគ្គីរបស់មហាគ្រួសារខ្មែរផងដែរ។ ពិព័រណ៍នេះ មានស្តង់សរុបចំនួន ២៨៣ស្តង់ ក្នុងនោះស្តង់របស់អាជីវករខ្មែរមានចំនួន ២២៩ និងស្តង់ដៃគូសហការរៀបចំព្រឹត្តិការណ៍ពិព័រណ៍មានចំនួន ៥៤ស្តង់៕

អត្ថបទ៖ ឈិត បូរ៉ាវី