​

វិមានក្រឹមឡាំងកាលពីថ្ងៃសុក្រ ទី២៦ ខែកញ្ញា បានរិះគន់ខ្លាំងៗការអំពាវនាវឱ្យសម្ព័ន្ធមិត្តរបស់ណាតូក្នុងការបាញ់ទម្លាក់យន្តហោះរុស្ស៊ីដែលចូលទៅក្នុងដែនអាកាសរបស់ខ្លួនថា «ខ្វះការពិចារណា» បន្ទាប់ពីប្រធានាធិបតីសហរដ្ឋអាមេរិក លោក Donald Trump បាននិយាយថាសមាជិកសម្ព័ន្ធមិត្ត គួរតែធ្វើដូច្នេះ។

ប្រទេសជាច្រើនរបស់សម្ព័ន្ធយោធាណាតូ បានចោទប្រកាន់ទីក្រុងមូស្គូថាបានសាកល្បងសម្ព័ន្ធយោធានេះដោយការរំលោភលើដែនអាកាសរបស់សហភាពអឺរ៉ុបដោយយន្តហោះចម្បាំង និងយានដ្រូនក្នុងប៉ុន្មានសប្តាហ៍ថ្មីៗនេះ។ នៅពេលត្រូវបានសួរថាតើ បណ្តារដ្ឋសម្ព័ន្ធយោធាណាតូ គួរតែបាញ់ទម្លាក់យន្តហោះរុស្ស៊ីដែលបំពានដែនអាកាសរបស់ពួកគេឬយ៉ាងណា នោះលោកTrump បាននិយាយថា «ពិតប្រាកដណាស់»។

អ្នកនាំពាក្យវិមានក្រឹមឡាំង លោក Dmitry Peskov បាននិយាយទៅកាន់ទូរទស្សន៍រដ្ឋរុស្ស៊ីថា «សេចក្តីថ្លែងការណ៍មិនទទួលខុសត្រូវអំពីភាពចាំបាច់ក្នុងការបាញ់ទម្លាក់យន្តហោះរុស្ស៊ី ជាការខ្វះការពិចារណា មិនទទួលខុសត្រូវ និងនាំមកនូវផលវិបាកដ៏គ្រោះថ្នាក់»។

អគ្គលេខាធិការសម្ព័ន្ធយោធាណាតូ លោក Mark Rutte បាននិយាយថា លោកបានគាំទ្រដល់ការដាក់គោលដៅលើយន្តហោះរុស្ស៊ី ប្រសិនបើវាឆ្លងចូលទៅក្នុងដែនអាកាសរបស់រដ្ឋជាសមាជិកយើង។

លោកបានប្រាប់សារព័ត៌មាន Fox News ថា «ខ្ញុំយល់ស្របទាំងស្រុងនៅទីនេះជាមួយលោកប្រធានាធិបតី Trump» ហើយ NATO «ក៏នឹងធ្វើបន្ថែមទៀតផងដែរ ដើម្បីការពារប្រជាជនរបស់យើង»។