​

ស្នងការការពារជាតិសហភាពអឺរ៉ុប លោក Andrius Kubilius បាននិយាយកាលពីថ្ងៃសុក្រ ទី២៦ ខែកញ្ញា ថា រដ្ឋជួរមុខរបស់សហភាពអឺរ៉ុប បានឈានដល់ការយោគយល់គ្នាលើភាពចាំបាច់សម្រាប់ «របងការពារយានដ្រូន» ជាមួយនឹងសមត្ថភាពរាវរក តាមដាន និងស្ទាក់ចាប់កម្រិតខ្ពស់។ 

ថ្លែងនៅប្រទេសហ្វាំងឡង់ បន្ទាប់ពីសន្និសីទតាមបណ្តាញវីដេអូជាមួយបណ្តារដ្ឋមន្ត្រីការពារជាតិមកពីសមាជិកសហភាពអឺរ៉ុបជួរមុខ លោក Kubilius បាននិយាយថា មានភាពចាំបាច់ដើម្បីអភិវឌ្ឍសមត្ថភាពយានដ្រូនបន្ថែមទៀត ហើយផែនទីបង្ហាញផ្លូវបច្ចេកទេសលម្អិតនឹងត្រូវបានកំណត់ជាមួយអ្នកជំនាញរបស់ប្រទេស។ 

នគរបាលបាននិយាយថា អាកាសយានដ្ឋាន Aalborg របស់ប្រទេសដាណឺម៉ាក ដែលត្រូវបានប្រើប្រាស់សម្រាប់ជើងហោះហើរពាណិជ្ជកម្មនិងយោធា ត្រូវបានបិទដោយសារតែយានដ្រូនស្ថិតនៅក្នុងដែនអាកាសរបស់ខ្លួនរយៈពេលពីរថ្ងៃបន្ទាប់ពីអាកាសយានដ្ឋាន Copenhagen ដ៏សំខាន់របស់ប្រទេសនេះត្រូវបានបិទ ដោយសារការមើលឃើញយានដ្រូនដែលបង្កើនការព្រួយបារម្ភផ្នែកសន្តិសុខនៅអឺរ៉ុប។ 

ជាមួយគ្នានេះ អាជ្ញាធរប្រទេសន័រវេសក៏បានបិទដែនអាកាសនៅអាកាសយានដ្ឋាន Oslo រយៈពេលបីម៉ោងផងដែរកាលពីល្ងាចថ្ងៃចន្ទសប្តាហ៍នេះ បន្ទាប់ពីយានដ្រូនមួយគ្រឿងត្រូវបានគេប្រទះឃើញ។ ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា យានដ្រូនដែលបានធ្វើឲ្យផ្អាកជើងហោះហើរនៅអាកាសយានដ្ឋានធំរបស់ដាណឺម៉ាកនៅទីក្រុង Copenhagen គឺជាផ្នែកមួយនៃ «គំរូនៃការប្រជែងជាប់ជាប្រចាំនៅព្រំដែនរបស់យើង» ។