ទីភ្នាក់ងារសារព័ត៌មានរដ្ឋ WAM របស់ប្រទេសអេមីរ៉ាតអារ៉ាប់រួម (UAE) ឬអារ៉ាប់រួម នាថ្ងៃសៅរ៍ (ទី២៧ ខែកញ្ញា) នេះ បានរាយការណ៍ថា រដ្ឋមន្ត្រីការបរទេសអារ៉ាប់រួម លោក Sheikh Abdullah bin Zayed បានសង្កត់ធ្ងន់លើតម្រូវការបន្ទាន់ ក្នុងការបញ្ចប់សង្រ្គាមនៅតំបន់ហ្កាហ្សា អំឡុងពេលជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅខាងក្រៅមហាសន្និបាតអង្គការសហប្រជាជាតិ (UNGA) ក្នុងទីក្រុងញូវយ៉ក សហរដ្ឋអាមេរិក។

នេះគឺជាជំនួបលើកដំបូងរបស់លោក Netanyahu ជាមួយមន្ត្រីជាន់ខ្ពស់អារ៉ាប់ ចាប់តាំងពីមានការវាយប្រហារកាលពីថ្ងៃទី៩ ខែកញ្ញា ពីសំណាក់អ៊ីស្រាអែលទៅលើមេដឹកនាំក្រុមហាម៉ាស ក្នុងប្រទេសកាតា ដែលអារ៉ាប់រួមបានថ្កោលទោស និងតវ៉ាដោយការកោះអញ្ជើញឯកអគ្គរដ្ឋទូតរងរបស់អ៊ីស្រាអែល។

សារព័ត៌មាន WAM បានឲ្យដឹងថា លោក Sheikh Abdullah បានរំលឹកឡើងវិញនូវការប្តេជ្ញាចិត្តឥតងាករេរបស់អារ៉ាប់រួម ក្នុងការគាំទ្ររាល់គំនិតផ្តួចផ្តើមដែលមានបំណងសម្រេចបាននូវសន្តិភាពគ្រប់ជ្រុងជ្រោយដោយផ្អែកលើដំណោះស្រាយរដ្ឋ២ ជាវិធីមួយដែលបំពេញសេចក្តីប្រាថ្នាទាំងរបស់ប្រជាជនប៉ាឡេស្ទីន និងអ៊ីស្រាអែល។

គូរបញ្ជាក់ថា នៅដើមខែកញ្ញានេះ អារ៉ាប់រួមបានព្រមានអ៊ីស្រាអែលថា ការបញ្ចូលជាដែនដីឧបសម្ព័ន្ធនូវតំបន់កាន់កាប់ West Bank នឹងបង្កើតបានជា «បន្ទាត់ក្រហម» សម្រាប់ទីក្រុង Abu Dhabi ដែលនឹងធ្វើឲ្យខូចដល់ស្មារតីនៃកិច្ចព្រមព្រៀង Abraham ឆ្នាំ២០២០ ជាកតិកាសញ្ញាដែលបានធ្វើឲ្យមានប្រក្រតីភាពនូវទំនាក់ទំនង រវាងអារ៉ាប់រួម និងអ៊ីស្រាអែល៕