នៅទីក្រុងញូវយ៉ក សហរដ្ឋអាមេរិក កាលពីថ្ងៃសុក្រ (ទី២៦ ខែកញ្ញា) រដ្ឋមន្ត្រីការបរទេសនូវែលសេឡង់ លោក Winston Peters បាននិយាយថា ប្រទេសរបស់លោក នឹងមិនទទួលស្គាល់រដ្ឋប៉ាឡេស្ទីននៅពេលនេះទេ ប៉ុន្តែនៅតែប្តេជ្ញាចិត្ត ចំពោះដំណោះស្រាយរដ្ឋ២។

ក្នុងសន្ទរកថារបស់លោក នៅឯមហាសន្និបាតអង្គការសហប្រជាជាតិ (UNGA) លោក Peters បាននិយាយថា៖ «ដោយសង្រ្គាមនៅតែបន្តមាន ក្រុមហាម៉ាសនៅតែជារដ្ឋបាលជាក់ស្ដែងរបស់តំបន់ហ្កាហ្សា ហើយគ្មានភាពច្បាស់លាស់ អំពីជំហានបន្ទាប់ ចម្ងល់ជាច្រើនណាស់នៅតែមានដដែល ជុំវិញអនាគតរដ្ឋប៉ាឡេស្ទីន ដូច្នេះ វាមិនមែនជាការឆ្លាតវៃនោះឡើយ ដែលនូវែលសេឡង់ត្រូវប្រកាសការទទួលស្គាល់នៅពេលនេះ»។

ជាមួយគ្នានេះ លោក Peters បានបន្ថែមថា៖ «យើងក៏មានក្ដីបារម្ភផងដែរ ដែលថា ការផ្តោតទៅលើការទទួលស្គាល់ ក្នុងកាលៈទេសៈបច្ចុប្បន្ននេះ អាចធ្វើឲ្យមានភាពស្មុគស្មាញដល់កិច្ចប្រឹងប្រែង ដើម្បីទទួលបានបទឈប់បាញ់ ដោយរុញឲ្យអ៊ីស្រាអែល និងក្រុមហាម៉ាស ចូលទៅក្នុងជំហរមិនព្រមចរចាបន្ថែមទៀត»។

គួរបញ្ជាក់ថា ជំហររបស់នូវែលសេឡង់ គឺផ្ទុយនឹងជំហានរបស់ដៃគូប្រពៃណីរបស់ខ្លួន គឺអូស្ត្រាលី កាណាដា និងអង់គ្លេស ដែលសុទ្ធតែបានទទួលស្គាល់រដ្ឋប៉ាឡេស្ទីនកាលពីថ្ងៃអាទិត្យចុងសប្ដាហ៍កន្លងមក។ ចំណាត់ការនេះបានធ្វើឲ្យពួកគេស្របជាមួយនឹងប្រទេសជាង ១៤០ផ្សេងទៀតដែលគាំទ្រសេចក្តីប្រាថ្នារបស់ប៉ាឡេស្ទីន ក្នុងការបង្កើតមាតុភូមិឯករាជ្យមួយចេញពីដែនដីត្រូវបានកាន់កាប់៕