នាថ្ងៃសៅរ៍ (ទី២៧ ខែកញ្ញា) នេះ អាជ្ញាធរបានឲ្យដឹងថា ចំនួនអ្នកស្លាប់ដោយសារទឹកជំនន់ដែលបង្កឡើងដោយភ្លៀងធ្លាក់ខ្លាំងរដូវមូសុង នៅក្នុងប្រទេសថៃ បានកើនឡើងដល់យ៉ាងហោចណាស់ ៧នាក់ហើយ ខណៈកិច្ចប្រឹងប្រែងជួយសង្គ្រោះនៅតែបន្តមាន។

នាយកដ្ឋានបង្ការ និងកាត់បន្ថយគ្រោះមហន្តរាយ បានឲ្យដឹងនៅក្នុងសេចក្តីថ្លែងការណ៍មួយថា មនុស្សជាង ២៦០.០០០នាក់ នៅទូទាំងខេត្តមួយចំនួនតាមដងទន្លេ Chao Phraya ត្រូវបានរងផលប៉ះពាល់ដោយទឹកជំនន់ ក្នុងសប្តាហ៍នេះ។

ប្រទេសថៃមិនរងគ្រោះដោយសារព្យុះត្រូពិក Bualoi ដែលវាយប្រហារហ្វីលីពីននៅសប្តាហ៍នេះឡើយ ប៉ុន្តែនាយកដ្ឋានឧតុនិយម បានព្រមានអំពីការមានភ្លៀងធ្លាក់ខ្លាំង ក្នុងរយៈពេលប៉ុន្មានថ្ងៃខាងមុខ។

ព្រះរាជាណាចក្រមួយនេះមានភ្លៀងធ្លាក់ខ្លាំងជាប្រចាំ ចាប់ពីខែមិថុនា ដល់ខែកញ្ញា ប៉ុន្តែអ្នកជំនាញលើកឡើងថា បម្រែបម្រួលអាកាសធាតុដែលបង្កឡើងដោយមនុស្ស បាននាំឲ្យអាកាសធាតុអាក្រក់ធ្ងន់ធ្ងរកាន់តែកើនឡើង ដោយធ្វើឲ្យស្ថានភាពកាន់តែមិនអាចទាយទុកជាមុនបាន។

នៅភាគខាងជើងប្រទេសនេះ កាលពីខែសីហា មនុស្ស ៥នាក់ បានបាត់បង់ជីវិត ហើយ ១៥នាក់ បានរងរបួស អំឡុងពេលមានបំណាក់ដី និងទឹកជំនន់ដែលបង្កឡើងដោយព្យុះទីហ្វុង Kajiki៕