បើយោងតាមមន្ត្រីក្រសួងការបរទេសទីក្រុងសេអ៊ូល បានឲ្យដឹងថា កិច្ចប្រជុំ រវាងកូរ៉េខាងជើង និងសហរដ្ឋអាមេរិក នៅខាងក្រៅកិច្ចប្រជុំកំពូល APEC នាឆ្នាំនេះ នៅក្នុងប្រទេសកូរ៉េខាងត្បូង «មិនអាចត្រូវបានច្រានចោល» ឡើយ។

ទំនាក់ទំនង រវាងទីក្រុងព្យុងយ៉ាង និងទីក្រុងវ៉ាស៊ីនតោន បានស្ថិតក្នុងភាពអាប់អួខ្លាំង ចាប់តាំងពីជំនួបកំពូលដ៏លេចធ្លោ រវាងមេដឹកនាំកូរ៉េខាងជើង លោក Kim Jong Un និងលោកប្រធានាធិបតី Donald Trump ក្នុងឆ្នាំ២០១៩ បានដួលរលំ ពាក់ព័ន្ធនឹងការបន្ធូរបន្ថយទណ្ឌកម្ម និងសម្បទាននុយក្លេអ៊ែររបស់ទីក្រុងព្យុងយ៉ាង។

ចាប់តាំងពីពេលនោះមក កូរ៉េខាងជើងបានប្រកាសម្តងហើយម្តងទៀតថា ខ្លួនជារដ្ឋនុយក្លេអ៊ែរ «មិនអាចកែប្រែវិញបាន» ឡើយ ទោះបីជាថ្មីៗនេះ លោក Kim បានបង្ហាញពីឆន្ទៈក្នុងការបើកកិច្ចសន្ទនាឡើងវិញជាមួយទីក្រុងវ៉ាស៊ីនតោនក៏ដោយ។

កាលពីថ្ងៃសុក្រ (ទី២៦ ខែកញ្ញា) នៅទីក្រុងញូវយ៉ក សហរដ្ឋអាមេរិក មន្ត្រីជាន់ខ្ពស់ពីក្រសួងការបរទេសកូរ៉េខាងត្បូង បានបង្ហើបឲ្យដឹងថា កិច្ចពិភាក្សាបែបនេះ អាចកើតឡើងនៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលគ្រោងចាប់ផ្តើមនៅចុងខែតុលា។ នៅពេលត្រូវបានសួរ អំពីកិច្ចប្រជុំនាពេលអនាគត មន្ត្រីរូបនេះបានតបថា៖ «យើងមិនអាចបដិសេធនូវលទ្ធភាពបែបនេះឡើយ»។

លោក Trump ត្រូវបានគេរំពឹងថា នឹងចូលរួមវេទិកានេះដែលនឹងប្រព្រឹត្តទៅនៅទីក្រុង Gyeongju របស់កូរ៉េខាងត្បូង។ តែយ៉ាងណាក្ដី មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះនោះ មិនបានផ្តល់ព័ត៌មានលម្អិតថា តើការចរចា រវាងសហរដ្ឋអាមេរិក និងកូរ៉េខាងជើង អាចនឹងកើតឡើងនៅទីណា ឬទម្រង់អ្វីដែលភាគីទាំង២ នឹងធ្វើការភិភាក្សានោះទេ៕