ក្នុងសេចក្តីថ្លែងការណ៍មួយដែលបានបង្ហោះលើកម្មវិធីផ្ញើសារ Telegram អភិបាលតំបន់ លោក Oleg Nikolaev បានឲ្យដឹងថា យានដ្រូនរបស់អ៊ុយក្រែន នៅថ្ងៃសៅរ៍ (ទី២៧ ខែកញ្ញា) នេះ បានវាយប្រហារស្ថានីយ៍បូមប្រេង នៅមាត់ទន្លេ Volga នៃតំបន់ Chuvashia របស់រុស្ស៊ី ដែលបណ្តាលឲ្យស្ថានីយ៍នេះត្រូវផ្អាកដំណើរការ។

លោក Nikolaev បានឲ្យដឹងថា ការវាយប្រហារនេះ បានកើតឡើងនៅជិតភូមិ Konar ចម្ងាយប្រហែល ១.២០០គីឡូម៉ែត្រ ពីដែនដីអ៊ុយក្រែន។ តែលោកបានបញ្ជាក់ថា មិនមានអ្នករងរបួសទេ ហើយបង្កឲ្យមាន «ការខូចខាតតូចតាច» ប៉ុណ្ណោះ។

គួរបញ្ជាក់ថា អ៊ុយក្រែនបានបង្កើនការវាយប្រហារដោយយាដ្រូនលើហេដ្ឋារចនាសម្ព័ន្ធថាមពលរបស់រុស្ស៊ីក្នុងប៉ុន្មានសប្តាហ៍ថ្មីៗនេះ ដោយផ្តោតលើរោងចក្រចម្រាញ់ប្រេង និងស្ថានីយនាំចេញ ដើម្បីកាត់បន្ថយប្រាក់ចំណូលពីការនាំចេញរបស់ទីក្រុងមូស្គូ បង្កឲ្យមានការមិនសប្បាយចិត្តក្នុងស្រុក និងជំរុញឲ្យវិមានក្រឹមឡាំងចូលទៅចរចាសន្តិភាព។

ការវាយប្រហារទាំងនោះបានកាត់បន្ថយការចម្រាញ់ប្រេងរបស់រុស្ស៊ី ស្ទើរតែ ១ភាគ៥ រយៈពេលប៉ុន្មានថ្ងៃ និងកាត់បន្ថយការនាំចេញពីកំពង់ផែសំខាន់ៗ ដែលជំរុញឲ្យទីក្រុងមូស្គូកាន់តែកៀកនឹងកាត់បន្ថយផលិតកម្មប្រេងរបស់ខ្លួន៕