​បាល់ទាត់៖ ​អតីត​ខ្សែបម្រើ និង​អ្នកចាត់ការ​តោ​ខៀវ Chelsea, Frank Lampard បានបញ្ចប់​រួច​រាល់​​ក្នុងការ​ចុះហត្ថលេខា​ដឹកនាំក្រុម Everton ជាមួយនឹង​កិច្ចសន្យា ២ឆ្នាំកន្លះ​។ ​​បុរស​វ័យ ៤៣ឆ្នាំ​រូបនេះ​បានមក​បន្ត​តំណែង​ពី​អ្នកចាត់ការ​សញ្ជាតិ​អេ​ស្ប៉ា​ញ Rafael Benitez ដែល​ត្រូវបាន​បណ្តេញចេញ​កាលពីដើម​ខែក្រោយ​ដឹកនាំ​ឈ្នះ​តែ ១ ក្នុង ១៣ប្រកួត​ចុងក្រោយ​។

​តាមពិតទៅ Everton និង Lampard បាន​ព្រមព្រៀងគ្នា​តាំងពី​ថ្ងៃ​សុក្រ​នៅពេល Everton ជួប​សម្ភាសន៍​ជាមួយ​បេក្ខភាព​ថ្មី​ដែល​រួមមាន​ទាំង​គ្រូបង្វឹក​សញ្ជាតិ​ព័រទុយហ្កាល់ Vitor Pereira និង​អ្នកចាត់ការ​បណ្តោះអាសន្ន​បច្ចុប្បន្ន Duncan Ferguson​។​ ​​Frank Lampard ដែល​នៅ​ទំនេរ​ពី​ការងារ​តាំងពី Chelsea បញ្ចប់​តំណែង​ឆ្នាំមុន​នោះ នឹង​ដឹកនាំ Everton ប្រកួត​ដំបូង​នៅ​ថ្ងៃ​សៅរ៍​នេះ​ជុំ​ទី៤ FA Cup ជួប​ជាមួយ Brentford នៅ Goodison Park មុននឹង​បន្ត​ជួប​ជាមួយ Newcastle United នៅ​ថ្ងៃ​អង្គារ​សប្តាហ៍​ក្រោយ​។ ​Everton ជាមួយគ្នា​នោះដែរ​ក៏បាន​ឈានដល់​កិច្ចព្រមព្រៀង​​ខ្ចី​​ខ្សែបម្រើហូ​ឡង់ Donny van der Beek ពី​ក្រុម​បិសាច​ក្រហម Manchester United ផង​ដែរ​៕

​អត្ថបទ​៖​នាង សុភា​វុ​ធ