ក្រុមអ្នកចរចាពាណិជ្ជកម្មអាមេរិក បានប្រាប់សមភាគីឥណ្ឌារបស់ពួកគេថា ការទប់ស្កាត់ការទិញប្រេងពីរុស្ស៊ី មានសារៈសំខាន់ណាស់ ក្នុងការកាត់បន្ថយអត្រាពន្ធលើឥណ្ឌា និងការឈានដល់កិច្ចព្រមព្រៀងពាណិជ្ជកម្ម។ នេះបើតាមបុគ្គល ២រូបដែលដឹងពីកិច្ចពិភាក្សានេះ បានប្រាប់សារព័ត៌មានរ៉យទ័រ។

បើទោះបីជាការចរចាពាណិជ្ជកម្មកំពុងស្ថិតនៅលើផ្លូវវិជ្ជមានក៏ដោយ ក៏មន្ត្រីអាមេរិកម្នាក់ បាននិយាយថា ការងារបន្ថែមទៀត គឺត្រូវការជាចាំបាច់ ដើម្បីធានាថា ឥណ្ឌាដោះស្រាយកង្វល់របស់សហរដ្ឋអាមេរិក ជុំវិញសិទ្ធិចូលទៅកាន់ទីផ្សារ ឱនភាពពាណិជ្ជកម្ម និងការទិញប្រេងពីរុស្ស៊ី។

ប្រធានាធិបតីអាមេរិក លោក Donald Trump បានព្យាយាមដាក់សម្ពាធលើឥណ្ឌា សហភាពអឺរ៉ុប និងសមាជិកនៃអង្គការណាតូ (NATO) ដើម្បីទប់ស្កាត់ការទិញប្រេងពីរុស្ស៊ី ដែលជាមធ្យោបាយកាត់បន្ថយប្រាក់ចំណូលរបស់ទីក្រុងមូស្គូ និងពន្លឿនដំណើរការបញ្ចប់សង្រ្គាម នៅអ៊ុយក្រែន។

រដ្ឋបាលរបស់លោក Trump បានបង្ហាញឆន្ទៈក្នុងការប្រើប្រាស់ឥទ្ធិពលធំបំផុត ដើម្បីពន្លឿនគោលដៅគោលនយោបាយរបស់ខ្លួន ដូចដែលបានបង្ហាញដោយភ្ជាប់វាទៅនឹងការចរចាពាណិជ្ជកម្មជាមួយឥណ្ឌា ដែលទាមទារឲ្យប្រទេសនេះទប់ស្កាត់ការទិញប្រេងពីរុស្ស៊ី។ លោក Trump បានបង្ហាញការខកចិត្តខ្លាំងឡើងៗ ចំពោះវឌ្ឍនភាពយឺតយ៉ាវឆ្ពោះទៅរកការបញ្ចប់សង្រ្គាមរបស់រុស្ស៊ី នៅអ៊ុយក្រែន ជាជម្លោះដែលលោកបានសន្យាថា នឹងដោះស្រាយតាំងពីថ្ងៃដំបូងពេលលោកចូលកាន់តំណែង។

សហរដ្ឋអាមេរិកបានដាក់ពន្ធបន្ថែម ២៥ភាគរយលើការនាំចូលពីឥណ្ឌា ដើម្បីដាក់សម្ពាធឲ្យទីក្រុងញូវដេលីបញ្ឈប់ការទិញប្រេងឆៅពីរុស្ស៊ី ដែលលក់បញ្ចុះតម្លៃ ដោយនាំឲ្យពន្ធទណ្ឌកម្មសរុបលើទំនិញឥណ្ឌាឡើងដល់ ៥០ភាគរយ និងប៉ះពាល់ដល់ការចរចាពាណិជ្ជកម្ម រវាងប្រទេសប្រជាធិបតេយ្យទាំង២៕