ប្រព័ន្ធផ្សព្វផ្សាយរដ្ឋ បានឲ្យដឹងថា រញ្ជួយដីកម្រិត ៥,៦រ៉ិកទ័រ បានធ្វើឲ្យដំបូលផ្ទះរបើករបាញ និងបំផ្លាញផ្ទះសម្បែងជាច្រើនខ្នង នាថ្ងៃសៅរ៍ (ទី២៧ ខែកញ្ញា) នេះ ក្នុងខេត្ត Gansu នៅភាគពាយព្យនៃប្រទេសចិន។

ទូរទស្សន៍រដ្ឋ CCTV បានផ្សាយថា មនុស្ស ១១នាក់យ៉ាងតិច ត្រូវបានបញ្ជូនទៅមន្ទីរពេទ្យក្នុងតំបន់ ដោយមានរបួស។ ចំណែកទីភ្នាក់ងារព័ត៌មាន Xinhua បានឲ្យដឹងថា មនុស្ស ៥នាក់ ក្នុងចំណោម ៦នាក់ដែលត្រូវបាននាំទៅកាន់មន្ទីរពេទ្យមួយ ត្រូវបានអនុញ្ញាតឲ្យសម្រាកព្យាបាលបន្ថែមទៀត។ អ្នកទាំងនោះស្ថិតក្នុងស្ថានភាពមានស្ថិរភាព។

មជ្ឈមណ្ឌលរញ្ជួយដីរបស់រដ្ឋាភិបាលចិន បានឲ្យដឹងថា រញ្ជួយដីបានកើតឡើងនៅម៉ោង ៥ និង ៤៩នាទីព្រឹក នៅតំបន់ Longxi ដោយមានជម្រៅប្រហែល ១០គីឡូម៉ែត្រ។ ចំណុចកណ្តាលនៃការរញ្ជួយនេះមានចម្ងាយប្រហែល ១៤០គីឡូម៉ែត្រ នៅភាគអាគ្នេយ៍នៃទីក្រុង Lanzhou។

ប្រព័ន្ធផ្សព្វផ្សាយរដ្ឋ បានឲ្យដឹងបន្ថែមថា ផ្ទះចំនួន ១៧ខ្នង ត្រូវបានបំផ្លាញ ហើយអគារលំនៅឋានជាង ៣.៥០០ខ្នង ត្រូវបានខូចខាត។ មនុស្សប្រហែល ៧.៨០០នាក់ នៅតំបន់ Longxi និង Zhangxian ត្រូវបានរើទៅនៅកន្លែងសុវត្ថិភាព៕