វាយសី៖ ក្លិបកីឡាវាយសី SBC នាខេត្តសៀមរាបបានឈ្នះមេដាយច្រើនជាងគេ ក្នុងការប្រកួតកីឡាវាយសីដណ្ដើមពានរង្វាន់ ៧មករា ដែលរៀបចំដោយសហព័ន្ធកីឡាវាយសីកម្ពុជារយៈពេល ២ថ្ងៃកាលពីចុងសប្ដាហ៍កន្លងទៅនៅក្លិបកីឡាវាយសីខេត្តសៀមរាប។
ពិធីបិទការប្រកួតពានរង្វាន់អបអរសាទរទិវាជ័យជម្នះ ៧មករាលើកទី២១ នេះបានធ្វើឡើងក្រោមវត្តមានឯកឧត្តម ទៀ សីហា អភិបាលខេត្តសៀមរាប និងឯកឧត្តម លី កុល ប្រធានសហព័ន្ធកីឡាវាយសីកម្ពុជារួមទាំងប្រតិភូ គ្រូបង្វឹក និងកីឡាករ-កីឡាការិនីជាច្រើនទៀត។ ព្រឹត្តិការណ៍ប្រចាំឆ្នាំនេះមានកីឡាករ-កីឡាការិនី ១៦៨នាក់មកពី ១៨សមាគម/ក្លិបចូលរួម ដែលធ្វើការប្រកួតលើ ៧វិញ្ញាសា ជាលទ្ធផលក្លិបកីឡាវាយសី SBC ខេត្តសៀមរាបដែលជាម្ចាស់ផ្ទះដណ្ដើមបានមេដាយច្រើនជាងគេសរុប ២៦គ្រឿងរួមមានមេដាយមាស ៨, ប្រាក់ ៤ និងសំរឹទ្ធ ១៤។ ឯកឧត្តម លី កុសល បានបង្ហាញនូវក្តីមោទនភាពចំពោះសមិទ្ធផលថ្មីមួយទៀត នៃក្លិបកីឡាវាយសី SBC ដែលបានបង្កើតទីលានស្ដង់ដារ និងបានទទួលរៀបចំព្រឹត្តិការណ៍អបអរសាទរទិវាជ័យជម្នះ ៧មករាលើកទី២១ ដោយជោគជ័យ ហើយលោករំពឹងថា វត្តមានក្លិបនេះនឹងរួមចំណែកអភិវឌ្ឍន៍វិស័យកីឡាវាយសី ឲ្យកាន់តែរីកចម្រើនផងដែរ។
ទន្ទឹមជាមួយគ្នា ឯកឧត្តម ទៀ សីហា បានធ្វើការវាយតម្លៃខ្ពស់ចំពោះសាវតា នៃការបង្កើតឡើងនូវការប្រកួតកីឡាវាយសីពានរង្វាន់ ៧មករា ថាគឺជាការរក្សាស្មារតីនៃការដឹងគុណមិនអាចកាត់ថ្លៃបាន ចំពោះប្រវត្តិសាស្ត្រនៃការរស់នៅឡើងវិញនៃប្រជាជាតិកម្ពុជា ចេញពីរបបប្រល័យពូជសាស និងជាព្រឹត្តិការណ៍ដែលបាននាំមកនូវមិត្តភាព សាមគ្គីភាព និងសុខភាពទៀតផង។ សូមរំឭកថា ការប្រកួតកីឡាវាយសីពានរង្វាន់ ៧មករានេះបានបង្កើតឡើងដំបូង កាលពីឆ្នាំ២០០១ ក្រោមការរៀបចំរបស់សហព័ន្ធកីឡាវាយសីកម្ពុជា ហើយបានកំណត់ការប្រកួតនេះជាព្រឹត្តិការណ៍ប្រចាំឆ្នាំ ជាមួយការប្ដូរវេនរៀបចំការប្រកួតតាមបណ្ដាខេត្តជាបន្ដបន្ទាប់ ជាក់ស្ដែងខេត្តដែលនឹងត្រូវបន្ដវេនធ្វើម្ចាស់ផ្ទះ បន្ទាប់ពីខេត្តសៀមរាបគឺខេត្តត្បូងឃ្មុំ ដែលនឹងត្រូវរៀបចំការប្រកួតលើកទី២២ នាឆ្នាំ២០២៣ ខាងមុខ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
