អាជ្ញាធរសុខាភិបាលហ្កាហ្សា ដែលគ្រប់គ្រងដោយក្រុមហាម៉ាស បាននិយាយក្នុងសេចក្តីថ្លែងការណ៍មួយកាលពីថ្ងៃអាទិត្យ (២៨ កញ្ញា) ថា ចំនួនអ្នកស្លាប់របស់ប៉ាឡេស្ទីន នៅដែនដីហ្កាហ្សាស្ទ្រីប បន្តកើនឡើងជារៀងរាល់ថ្ងៃដល់ចំនួន ៦៦.០០៥នាក់ហើយ និងមានអ្នករបួសសរុប ១៦៨.១៦២នាក់ ចាប់តាំងពីជម្លោះរវាងក្រុមហាម៉ាស និងអ៊ីស្រាអែល បានផ្ទុះឡើងកាលពីថ្ងៃទី៧ ខែតុលា ឆ្នាំ២០២៣មក។ 

សេចក្តីថ្លែងការណ៍បន្តថា ក្នុងពេល ២៤ម៉ោងកន្លងទៅនោះ ការវាយប្រហាររបស់អ៊ីស្រាអែល បានសម្លាប់មនុស្ស ៧៩នាក់ និងរបួស ៣៧៩នាក់ផ្សេងទៀត ក្នុងតំបន់ហ្កាហ្សា។

ជាមួយគ្នានេះ កងកម្លាំងអ៊ីស្រាអែល កំពុងបិទច្រកនៅផ្នែកខាងលិចនៃទីក្រុងហ្កាហ្សា ជាទីដែលមនុស្សរាប់សែននាក់កំពុងជ្រកកោន។ មនុស្សរាប់សែននាក់ទៀតបានភៀសខ្លួនទៅភាគខាងត្បូង ក្រោមបញ្ជាជម្លៀសរបស់អ៊ីស្រាអែល ឱ្យស្វែងរកទីជម្រក មុនពេលការវាយប្រហារ។ អ្នកស្រុកនិយាយថា មនុស្សជាច្រើនត្រូវបង្ខំឱ្យរស់នៅក្នុងតង់ ហើយអ្នកខ្លះទៀតគ្មានសូម្បីតែទីជម្រកបណ្ដោះអាសន្នបែបនេះ។

អ៊ីស្រាអែលនិយាយថា ការវាយប្រហាររបស់ខ្លួនលើទីក្រុងហ្កាហ្សា គឺមានគោលបំណងកម្ចាត់ចោលកាកសំណល់នៃចលនាអ៊ិស្លាមហាម៉ាស។ កម្មវិធីស្បៀងអាហារពិភពលោក WFP របស់អង្គការសហប្រជាជាតិ បាននិយាយថា ជនប៉ាឡេស្ទីនប្រហែលរាប់សែននាក់ បានចាកចេញពីទីក្រុងហ្កាហ្សាហើយ ចាប់តាំងពីអ៊ីស្រាអែល ចាប់ផ្តើមការវាយលុកជើងគោកកាលពីប៉ុន្មានសប្តាហ៍មុនមក ប៉ុន្តែមនុស្សរាប់ម៉ឺននាក់ទៀតនៅតែជាប់នៅទីនោះយ៉ាងគ្រោះថ្នាក់៕