ការប៉ះទង្គិចគ្នាដោយហិង្សាបានផ្ទុះឡើងកាលពីថ្ងៃអាទិត្យ (២៨ កញ្ញា) នៅប្រទេសអេក្វាឌ័រ រវាងអាជ្ញាធរអនុវត្តច្បាប់ និងក្រុមជនជាតិដើមភាគតិច ដែលតវ៉ាប្រឆាំងនឹងការបញ្ចប់ការឧបត្ថម្ភធនប្រេងរបស់រដ្ឋ ដោយធ្វើឱ្យជនស៊ីវិលម្នាក់ស្លាប់ និងទាហាន ១២នាក់ រងរបួស។

យោធា និងអង្គការជនជាតិដើមភាគតិច ដែលនៅពីក្រោយបាតុកម្មនេះ បានស្តីបន្ទោសដាក់គ្នាទៅមកចំពោះអំពើហិង្សា ដែលបានកើតឡើងនៅក្នុងសហគមន៍តំបន់ភ្នំអង់ នៅភាគខាងជើងរដ្ឋធានីគីតូ។ ក្រសួងការពារជាតិ និងមហាផ្ទៃរបស់អេក្វាឌ័រ មិនបានទទួលស្គាល់ភ្លាមៗចំពោះការស្លាប់របស់អ្នកតវ៉ាម្នាក់នេះទេ។

បាតុកម្មថ្ងៃអាទិត្យនោះ គឺជាថ្ងៃទី៧ ហើយនៃការតវ៉ាជាបន្តបន្ទាប់។ ស្ថានភាពអាសន្ន និងបម្រាមគោចរនៅតែបន្តជាធរមានក្នុងខេត្តមួយចំនួន ដែលមានចំនួនប្រជាជនដើមភាគតិចច្រើនជាងគេ។ បាតុកម្មបានផ្ទុះឡើងលើកដំបូង បន្ទាប់ពីលោកប្រធានាធិបតី Daniel Noboa កាលពីថ្ងៃទី១២ ខែកញ្ញា បានបញ្ជាឱ្យលុបចោលការឧបត្ថម្ភធនរបស់រដ្ឋសម្រាប់ប្រេងម៉ាស៊ូត ដោយធ្វើឱ្យតម្លៃប្រេងកើនពី ១,៨០ដុល្លារក្នុងមួយហ្គាឡុង ដល់តម្លៃ ២,៨០ដុល្លារ យ៉ាងគំហុក។

លោក Noboa បានចោទក្រុមបាតុករទាំងនោះថា មានទំនាក់ទំនងជាមួយក្រុមឧក្រិដ្ឋកម្មមានអង្គការចាត់តាំង និងក្រុមរុករករ៉ែខុសច្បាប់។ តួលេខផ្លូវការបង្ហាញថា មនុស្សជាង ៨០នាក់ ត្រូវចាប់ខ្លួនក្នុងបាតុកម្ម ហើយមនុស្សយ៉ាងតិច ១៣នាក់ ក្នុងចំណោមនោះ កំពុងប្រឈមនឹងបទចោទពីអំពើភេរវកម្ម៕