ស្ថានភាពភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នាព្រឹកថ្ងៃទី២៩ ខែកញ្ញា ឆ្នាំ២០២៥ ស្ងប់ស្ងាត់ តែកងកម្លាំងកម្ពុជាដែលមិនប្រដាប់អាវុធ និងប្រជាពលរដ្ឋបន្តរក្សាស្ថាបការណ៍យ៉ាងល្អ និងរឹងមាំ។

កងកម្លាំងកម្ពុជាដែលមិនប្រដាប់អាវុធនៅបន្តឈរជើងយ៉ាងរឹងមាំដោយគោរព និងអនុវត្តបទឈប់បាញ់យ៉ាងពេញលេញ និងខ្ជាប់ខ្ជួនបំផុត ខណៈដែលប្រជាពលរដ្ឋនៅបន្តក្រាញ់ននៀលចាំរារាំង និងទប់ទល់ស្ថានការណ៍នានាដែលបង្កហេតុពីភាគីថៃ។

ប្រជាពលរដ្ឋបានឱ្យដឹងថា ស្ថានការណ៍ហាក់ស្ងប់ស្ងាត់នៅថ្ងៃទី២៩ ខែកញ្ញា ឆ្នាំ២០២៥ តែគាត់ទាំងអស់គ្នានៅតែក្រាញ់ននៀលការពារភូមិ ការពារទឹកដី

ជាមួយគ្នានេះ កម្ពុជាបានសម្តែងនូវការព្រួយបារម្ភយ៉ាងខ្លាំង ចំពោះការបង្កហេតុពីភាគីថៃ តែបែរជាមកចោទកម្ពុជាទៅវិញ។ រដ្ឋបាលខេត្តបន្ទាយមានជ័យកាលពីថ្ងៃទី២៨ ខែកញ្ញា ឆ្នាំ២០២៥ ក៏បានផ្ញើលិខិតតវ៉ាទៅកាន់អភិបាលខេត្តស្រះកែវ នៃព្រះរាជាណាចក្រថៃ ប្រឆាំងនឹងករណីរដ្ឋបាលខេត្តស្រះកែវ លើកបដានៅថ្ងៃទី២៨ ខែកញ្ញា ឆ្នាំ២០២៥ ដោយមានខ្លឹមសារប្រកាសអនុវត្តច្បាប់ក្នុងស្រុកថៃលើប្រជាពលរដ្ឋកម្ពុជារស់នៅក្នុងភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ នៃព្រះរាជាណាចក្រកម្ពុជា បានបញ្ជាក់ក្នុងលិខិតថា សូមតវ៉ាប្រឆាំងដាច់អហំការចំពោះសកម្មភាពនេះ៕