យន្តហោះចម្បាំងអ៊ីស្រាអែល បានវាយប្រហារគោលដៅជាច្រើនរបស់ក្រុមហេសបូឡា នៅភាគខាងត្បូងប្រទេសលីបង់កាលពីថ្ងៃអាទិត្យ ដែលជាការកើនឡើងភាពតានតឹងចុងក្រោយបំផុត នៅតាមព្រំដែនអ៊ីស្រាអែល-លីបង់ បើទោះបីជាបទឈប់បាញ់ត្រូវបានឈានដល់ កាលពីឆ្នាំមុនក៏ដោយ។

ទីភ្នាក់ងារព័ត៌មានរដ្ឋរបស់ប្រទេសលីបង់បានរាយការណ៍ថា យន្តហោះអ៊ីស្រាអែល បានធ្វើការវាយឆ្មក់ជាច្រើនដងលើតំបន់ជុំវិញ Kfar Remen និង Al-Jarmaq ដោយបានបាញ់មីស៊ីលពីអាកាសទៅលើគោលដៅលើដី ដែលបង្កឲ្យមានការផ្ទុះដ៏ខ្លាំងក្លា។ យានដ្រូនមួយគ្រឿង ក៏បានកំណត់គោលដៅលើផ្ទះមួយខ្នង នៅក្នុងភូមិ Houmine al-Fawqa ក្បែរភូមិ Nabatieh ខណៈពេលដែលយានដ្រូនមួយគ្រឿងផ្សេងទៀតបានហោះហើរក្នុងរយៈកម្ពស់ទាប នៅពីខាងលើភូមិមួយចំនួនក្បែរនោះ។

ប្រភពសន្តិសុខបានប្រាប់សារព័ត៌មានស៊ីនហួថា ការវាយប្រហារទាំងនោះ បានត្រូវចំទីតាំងរបស់ក្រុមហេសបូឡា ដែលត្រូវបានកំណត់គោលដៅពីមុន ដោយបន្ថែមថា ការវាយឆ្មក់យ៉ាងតិច ៦លើក ត្រូវបានធ្វើឡើង ក្នុងរយៈពេល ១៥នាទី ជុំវិញភូមិNabatieh ។ ពុំទាន់មានសេចក្តីរាយការណ៍ភ្លាមៗអំពីអ្នកស្លាប់និងរបួសនោះទេ។

យោធាអ៊ីស្រាអែល បាននិយាយថា កងកម្លាំងរបស់ខ្លួនវាយប្រហារឃ្លាំងអាវុធដែលប្រើប្រាស់ដោយក្រុមហេសបូឡា «ដើម្បីរុលចូលទៅមុខ និងធ្វើការវាយប្រហារភេរវកម្មប្រឆាំងនឹងរដ្ឋអ៊ីស្រាអែល»។ អ្នកនាំពាក្យយោធាលោក Avichay Adraee បានសរសេរនៅលើ X ថា វត្តមាននៃហេដ្ឋារចនាសម្ព័ន្ធបែបនេះ បានរំលោភលើកិច្ចព្រមព្រៀងរវាងអ៊ីស្រាអែល និងលីបង់៕