​បាល់ទាត់៖ ​ការប្រកួត​បាល់ទាត់​ជើងឯក​ទ្វីបអាហ្វ្រិក Africa Cup of Nations បាន​រកឃើញ ៤ក្រុម​ឡើង​វគ្គ​ពាក់កណ្តាល​ផ្តាច់ព្រ័ត្រ​ហើយ​បន្ទាប់ពី​អេ​ហ្ស៊ី​ប និង​សេ​ណេ​ហ្កា​ល់​យកឈ្នះ​គូប្រកួត​រៀងខ្លួន​យប់មិញ​។ ក្រុម​ជើងឯក ៧សម័យ​អេ​ហ្ស៊ី​ប​បាន​បន្តដំណើរ​ស្វែងរក​ជើងឯក​លើក​ទី៨ របស់ខ្លួន​ក្រោយ​យកឈ្នះ​ក្រុម​ជើងឯក​ឆ្នាំ១៩៧៦ ម៉ា​រ៉ុ​ក ២-១ នៅ​ម៉ោង​បន្ថែម​កាត់សេចក្តី ១៥នាទី​ពីរដង​។

​​ម៉ា​រ៉ុ​ក​ចាប់ផ្តើម​ដោយ​នាំ​មុខមុន​តាំងពី​នាទី​ទី៦ ដោយ​បាល់​ពិន័យ ១១ម៉ែត្រ​របស់ Sofiane Boufal តែ​វគ្គ​ទី២ លេង​បាន ៨នាទី​អេ​ហ្ស៊ី​ប​ក៏​តាម​ស្មើ​វិញ​នៅ​នាទី​ទី៥៣ ដោយ​ខ្សែប្រយុទ្ធ Liverpool, Mohamed Salah​។​ ​​Salah ដដែល​គឺជា​អ្នក​បញ្ជូន​ឱ្យមាន​គ្រាប់​បាល់​ជ័យជំនះ​សំរាប់​អេ​ហ្ស៊ី​ប​នៅ​ម៉ោង​បន្ថែម ១៥នាទី​លើក​ទី១ នាទី​ទី ១០០ ដែល​ស៊ុត​បញ្ចូល​ទី​ដោយ​ខ្សែប្រយុទ្ធ Aston Villa, Trezeguet​។ ​​ចំណែក​មួយគូ​ទៀត​ក្រុម​ជើងឯក​រង​ ២លើក​សេ​ណេ​ហ្កា​ល់បាន​បន្តដំណើរ​ស្វែងរក​ជើងឯក​លើកដំបូង​របស់ខ្លួន ​តាមរយៈ​ជ័យជំនះ​លើ​អេក្វាទ័រ​ហ្គី​ណេ ៣-១​។

អតីត​ខ្សែប្រយុទ្ធ Bristol, Famara Diedhiou ស៊ុត​បើក​ការនាំ​មុខមុន​ឱ្យ​សេ​ណេ​ហ្កា​ល់ទ​ទួល​បាល់​ពី Sadio Mane នៅ​នាទី​ទី២៨ មុន​ពេលដែល​អេក្វាទ័រ​ហ្គី​ណេ​តាម​ស្មើ​វិញ​នៅ​វគ្គទី២ ដោយ Jannik Buyla នាទី​ទី៥៧​។ ​​មិន​លេង​ដល់​ម៉ោង​បន្ថែម​ឡើយ​ក្រុម​ជើងឯក​រង​ឆ្នាំ២០១៩ សេ​ណេ​ហ្កា​ល់​ក៏​រកបាន​គ្រាប់​ជ័យជំនះ​ ២​គ្រាប់​ដោយកីឡាករ​បម្រុង Cheikhou Kouyate និង Ismaila Sarr​។ ​​ចំណែក​ការប្រកួត​កាលពី​ថ្ងៃ​សៅរ៍​ម្ចាស់ផ្ទះ​កា​មេ​រូ​ន​យកឈ្នះ​ហ្កាំ​ប៊ី ២-០ និង​បូ​គី​ណា​ហ្វា​សូ​យកឈ្នះ​ទុយ​នេ​ស៊ី ១-០​។ ​​ដូច្នេះ​វគ្គ​ពាក់កណ្តាល​ផ្តាច់ព្រ័ត្រ​បូ​គី​ណា​ហ្វា​សូនឹង​ជួប​សេ​ណេ​ហ្កា​ល់​នៅ​ថ្ងៃទី២ ខែកុម្ភៈ​ ខណៈ​អេ​ហ្ស៊ី​ប​ជួប​ម្ចាស់ផ្ទះ​កា​មេ​រូ​ន​មួយថ្ងៃ​បន្ទាប់​៕

​អត្ថបទ​៖​នាង សុភា​វុ​ធ