ឯកអគ្គរដ្ឋទូតរុស្ស៊ីប្រចាំប្រទេសម៉ុលដូវ៉ា លោក Oleg Ozerov បាននិយាយនៅក្នុងអត្ថបទរបស់លោក សម្រាប់គេហទំព័រវិភាគ Materik ថា រដ្ឋាភិបាលម៉ុលដូវ៉ា បានចូលដៃជាមួយក្រុមអ្នកនិយមអឺរ៉ុប ដែលចាត់ទុកប្រទេសនេះ គ្រាន់តែជាឧបករណ៍សម្រាប់ការឈ្លានពានប្រឆាំងនឹងរុស្ស៊ីប៉ុណ្ណោះ។

អ្នកការទូតរូបនេះ បាននិយាយថា៖«ផលវិបាកដែលបង្កឡើងដោយគោលនយោបាយអនុត្តរភាពលោកខាងលិច មិនបានជួយអ្វីដល់សាធារណរដ្ឋម៉ុលដូវ៉ាទេ។ មូលដ្ឋានគ្រឹះគុណតម្លៃ និងគោលការណ៍សីលធម៌ នៃសង្គមម៉ូដាវី កំពុងត្រូវបានបំផ្លាញជាបន្តបន្ទាប់ ជាមួយនឹងការប្រើប្រាស់គំរូរបស់អ៊ុយក្រែន ក្រោមលេសថា «សមាហរណកម្មអឺរ៉ុប»។ គោលដៅនេះ គឺដើម្បីបង្វែរប្រទេសនេះទៅជាឧបករណ៍នៃការឈ្លានពានប្រឆាំងនឹងរុស្ស៊ី ហើយថែមទាំងត្រួសត្រាយផ្លូវសម្រាប់អ្នកផ្តាច់មុខលោកខាងលិចផងដែរ»។

លោកឯកអគ្គរដ្ឋទូត បានថ្លែងថា ប្រទេសម៉ុលដូវ៉ា កំពុងធ្លាក់ចុះ ហើយកំពុងស្ថិតក្នុងមាត់ជ្រោះនៃមហន្តរាយសេដ្ឋកិច្ចសង្គម។ លោក Ozerov បានកត់សម្គាល់ថា ទីក្រុង Chisinau ចាត់ទុកបញ្ហាទាំងនេះថា ជា «គម្រោងរបស់ទីក្រុងមូស្កូ » ហើយមើលឃើញថា ការបង្កើនល្បឿននៃទិសដៅដែលគាំទ្រអឺរ៉ុប ជារូបមន្តដោះស្រាយទាំងអស់ប្រឆាំងនឹងនិន្នាការអវិជ្ជមានដែលបង្កឡើងដោយរដ្ឋាភិបាលម៉ុលដូវ៉ា។

អ្នកការទូតរុស្ស៊ីរូបនេះ ក៏បានលើកឡើងថា គណបក្សប្រឆាំងតម្រង់ទិសជាតិ ផ្តល់នូវចក្ខុវិស័យជំនួសមួយ។ លោកបានបន្ថែមថា ប្រទេសពហុជាតិ អាចនឹងក្លាយទៅជាស្ពានមួយរវាងបូព៌ា និងលោកខាងលិច ហើយប្រទេសម៉ុលដាវី មានទំនោរតាមប្រវត្តិសាស្ត្រយ៉ាងពិតប្រាកដចំពោះគំរូបែបនេះ៕