បណ្តាប្រទេសនៅអឺរ៉ុប បានថ្កោលទោសការវាយប្រហារទ្រង់ទ្រាយធំរបស់រុស្ស៊ីទៅលើអ៊ុយក្រែន និងបានអំពាវនាវឱ្យបង្កើនសម្ពាធលើទីក្រុងមូស្គូ។ កងទ័ពអាកាសអ៊ុយក្រែននិយាយថា យោធារុស្ស៊ីបានប្រើប្រាស់មីស៊ីលចំនួន៤៨គ្រាប់ និងយានដ្រូនប្រហែល៦០០គ្រឿងក្នុងការវាយប្រហារលើទីក្រុងគីវ និងផ្នែកផ្សេងទៀតនៅអ៊ុយក្រែនចាប់តាំងពីថ្ងៃសៅរ៍ ដល់ថ្ងៃអាទិត្យ។

មនុស្សបួននាក់បានស្លាប់ ក្នុងការវាយប្រហារលើរដ្ឋធានីប្រទេសអ៊ុយក្រែន។ តាមសេចក្តីរាយការណ៍ អ្នកនាំពាក្យក្រសួងការបរទេសប៉ូឡូញ បានបញ្ជាក់ថា បំណែកមីស៊ីលបានបំផ្លាញផ្នែកនៅកុងស៊ុលនៃស្ថានទូតប្រទេសប៉ូឡូញ ក្នុងទីក្រុងគីវ។

ប្រធានាធិបតីប្រទេសហ្វាំងឡង់ លោក Alexander Stubb បានចាត់ទុកការវាយប្រហារនេះថា «ឃោរឃៅ» នៅក្នុងការបង្ហោះលើបណ្តាញផ្សព្វផ្សាយសង្គមដោយនិយាយថាវា «បង្ហាញពិភពលោកនូវមុខមាត់ពិតរបស់អ្នកឈ្លានពាន»។ លោកបាននិយាយបន្ថែមថា «ពេលនេះគឺជាពេលវេលាដើម្បីអនុម័តកញ្ចប់ទណ្ឌកម្មបន្ទាប់របស់សហភាពអឺរ៉ុប និងរក្សាសម្ពាធលើក្បាលម៉ាស៊ីនសង្រ្គាមរបស់រុស្ស៊ី»។

រដ្ឋមន្ត្រីការបរទេសអេស្តូនី លោក Margus Tsahkna បានសរសេរនៅលើបណ្តាញផ្សព្វផ្សាយសង្គមថា «មានភាពស្ទាក់ស្ទើរគ្រប់គ្រាន់ហើយ» និងបានអំពាវនាវឱ្យបង្កើនការដាក់ទណ្ឌកម្ម ការដំឡើងពន្ធគយ និងការកាត់ផ្តាច់ទំនាក់ទំនង ហើយ «ការដាក់ឲ្យឯកោត្រូវតែបូករួម»។

ប្រទេសជាសមាជិកសហភាពអឺរ៉ុបនឹងបោះឆ្នោតលើកញ្ចប់ទណ្ឌកម្មថ្មីប្រឆាំងរុស្ស៊ី រួមទាំងផែនការដើម្បីដាក់បម្រាមលើការនាំចូលឧស្ម័នធម្មជាតិរាវពីរុស្ស៊ីនៅចុងឆ្នាំក្រោយ។