បន្ទាយប្រវត្តិសាស្រ្តនៅក្រុង Aleppo របស់ប្រទេសស៊ីរី បានបើកដំណើរការឡើងវិញជូនភ្ញៀវទេសចរក្នុងស្រុក និងអន្តរជាតិ ធ្វើឲ្យវាក្លាយជាពេលវេលានិមិត្តរូបមួយនៃការងើបឡើងវិញសម្រាប់ប្រទេសដែលហែកហួរដោយសារជម្លោះមួយនេះ ។

រូបភាពវីដេអូយានដ្រូនថតបានពីលើបន្ទាយបុរាណនេះ ឃើញវាស្ថិតនៅលើកំពូលភ្នំ នៅកណ្តាលទីក្រុង Aleppo ស្របពេលដែលភ្ញៀវទេសចរ ជួបជុំគ្នាទស្សនាបន្ទាយ ។

កិច្ចខិតខំស្តាឡើងវិញ បានចំណាយពេលរាប់ខែ និងផ្តោតសំខាន់លើការជួសជុលហេដ្ឋារចនាសម្ព័ន្ធ រួមទាំងប្រព័ន្ធទឹកស្អាត និងខ្សែចរន្តអគ្គិសនីផងដែរ ហើយនិងធ្វើឲ្យមានលំនឹងសសរស្តម និងជញ្ជាំងបន្ទាយ ។

លោក Mounir Al-Qassqas គឺជាបុរាណវិទូក្រុង Aleppo និយាយថា ការបើកដំណើរការតំបន់ប្រវត្តិសាស្រ្តបុរាណនេះ គឺជាជំហានវិជ្ជមានឆ្ពោះទៅមុខ ។

លោកបន្តថា បន្ទាយមួយនេះ ដូចគ្នានឹងពលរដ្ឋរស់នៅក្នុងទីក្រុង Aleppo អញ្ចឹងដែរ បានរងការខូចខាតយ៉ាងខ្លាំងអំឡុងសង្រ្គាម និងបដិវត្តន៍ពណ៌ ។ វានៅតែរឹងមាំ ឈរខ្ពស់ដូចជាពលរដ្ឋ Aleppo ដែរ ។

បន្ទាយមួយនេះ ដែលត្រូវបានចុះបញ្ជីដោយអង្គការវប្បធម៌ UNESCOថា ជាតំបន់បេតិកភណ្ឌពិភពលោក បានរងការខូចខាតយ៉ាងដំណំ នៅក្នុងសង្រ្គាមអូសបន្លាយពេលរវាងអតីតរដ្ឋាភិបាលស៊ីរី និងកងកម្លាំងប្រឆាំង មុនពេលបើកឡើងវិញកាលពីឆ្នាំ ២០១៨ ។

នៅឆ្នាំ ២០២៣ បន្ទាយមួយនេះ បានរងការខូតខាតបន្ថែមទៀតដោយសារការរញ្ជួយដីដែលបានអង្រួនតំបន់ភាគខាងត្បូងទួរគី និងតំបន់ភាគខាងជើងស៊ីរី ។ បន្ទាយមួយនេះ បានបិទទ្វារម្តងទៀតកាលពីខែធ្នូ ឆ្នាំ ២០២៤ ពេលកងកម្លាំងប្រឆាំង ចាប់ផ្តើមការវាយប្រហាររបស់ពួកគេ ដែលបានទម្លាប់អំណាចអតីតមេដឹកនាំស៊ីរីលោក Bashar al-Assad ៕