សហភាពអឺរ៉ុប (EU) នៅថ្ងៃចន្ទ (ទី២៩ ខែកញ្ញា) នេះ បានឲ្យដឹងថា ខ្លួនបានដាក់ទណ្ឌកម្មទាំងស្រុងឡើងវិញ លើអ៊ីរ៉ង់ ជុំវិញកម្មវិធីនុយក្លេអ៊ែររបស់ប្រទេសនេះ បន្ទាប់ពីអង្គការសហប្រជាជាតិ (UN) បានកំណត់ឡើងវិញនូវវិធានការណ៍ដ៏សំខាន់របស់ខ្លួន។

UN បានចាត់វិធានការនោះ កាលពីចុងសប្តាហ៍ បន្ទាប់ពីប្រទេសមហាអំណាចលោកខាងលិច បានបើកផ្លូវឲ្យមានយន្តការដែលគេហៅថា «ការដាក់ទណ្ឌកម្មស្វ័យប្រវត្តិឡើងវិញ» ក្រោមកិច្ចព្រមព្រៀងនុយក្លេអ៊ែរឆ្នាំ២០១៥។

ទណ្ឌកម្មដែលបានត្រូវបានណែនាំឡើងវិញដោយប្លុកមានសមាជិក ២៧ប្រទេស រួមមានវិធានការរបស់ UN ដែលរារាំងការពាក់ព័ន្ធនឹងសកម្មភាពនុយក្លេអ៊ែរ និងមីស៊ីលបាលីស្ទិករបស់ទីក្រុងតេអេរ៉ង់។

ប៉ុន្តែទណ្ឌកម្មទាំងនោះក៏ទៅហួសនូវការរួមបញ្ចូលវិធានការហិរញ្ញវត្ថុផងដែរ ដោយមានរួមទាំងការបង្កកទ្រព្យសកម្មរបស់ធនាគារកណ្តាលអ៊ីរ៉ង់។ ទីក្រុងតេអេរ៉ង់បានថ្កោលទោសថា នេះជារឿង «អយុត្តិធម៌» ក្នុងការដាក់ទណ្ឌកម្មរបស់ UN ឡើងវិញ។

យ៉ាងណាក្ដី ទោះបីជាមានការដាក់ទណ្ឌកម្មឡើងវិញនេះក៏ដោយ ក៏បណ្ដាមេដឹកនាំលោកខាងលិច បានសង្កត់ធ្ងន់ថា ផ្លូវក្នុងការសន្ទនា នៅតែបើកចំហជានិច្ច។ លោកស្រី Kaja Kallas អ្នកការទូតជាន់ខ្ពស់របស់ EU បាននិយាយកាលពីថ្ងៃអាទិត្យថា ការដាក់ទណ្ឌកម្មឡើងវិញ «មិនត្រូវជាចុងបញ្ចប់នៃកិច្ចការការទូតនោះឡើយ»៕