នៅថ្ងៃចន្ទនេះ វិមានក្រឹមឡាំង បានចោទប្រកាន់ក្រុមអាជ្ញាធរនៅប្រទេសម៉ុលដូវីថា បានរារាំងពលរដ្ឋរបស់ពួកគេរាប់ម៉ឺននាក់រស់នៅក្នុងប្រទេសរុស្ស៊ីពីការបោះឆ្នោតសភា ពោលគឺពួកគេផ្តល់មណ្ឌលបោះឆ្នោតតែ ២កន្លែងប៉ុណ្ណោះ សម្រាប់អ្នកបោះឆ្នោតនៅក្នុងសហព័ន្ធរុស្ស៊ី ។

លទ្ធផលបោះឆ្នោតបង្ហាញថា គណបក្សកាន់អំណាចគាំទ្រសហភាពអឺរ៉ុបរបស់ម៉ូលដូវី បានយកជ័យជំនះលើគូប្រជែងរបស់ខ្លួនដែលងាករករុស្ស៊ីនៅការបោះឆ្នោតកាលពីថ្ងៃអាទិត្យ គឺជាការជំរុញដ៏សំខាន់មួយសម្រាប់ពលរដ្ឋដែលចង់ចូលរួមជាមួយសហភាពអឺរ៉ុប និងបំបែកចេញពីគន្លងរបស់រុស្ស៊ី ។

នៅក្នុងការនិយាយតាមទូរស័ព្ទជាមួយក្រុមអ្នកសារព័ត៌មាន អ្នកនាំពាក្យវិមានក្រឹមឡាំងលោក Dmitry Peskovនិយាយថា ពលរដ្ឋម៉ុលដូវីរស់នៅក្នុងប្រទេសរុស្ស៊ីដែលទំនងជាបោះឆ្នោតឲ្យគណបក្សគាំទ្ររុស្ស៊ី ពុំអាចបោះឆ្នោតបាននោះទេ ។

លោកថា ពលរដ្ឋម៉ុលដូវីរាប់ម៉ឺននាក់ គ្មានឱកាសបោះឆ្នោតនោះទេនៅសហព័ន្ធរុស្ស៊ី ដោយសារការពិតថា មណ្ឌលបោះឆ្នោតតែ ២កន្លែងប៉ុណ្ណោះ ត្រូវបានបើកសម្រាប់ពួកគេ ។

នៅពេលសួរថាតើ ទីក្រុងមូស្គូទទួលស្គាល់លទ្ធផលការបោះឆ្នោតនេះឬ លោក Peskov កត់សំគាល់ឃើញថា កម្លាំងនយោបាយមួយចំនួននៅម៉ុលដូវី បាននិយាយពីការបំពាន ។

លោកបន្តថា បឋម ពលរដ្ឋម៉ុលដូវីខ្លួនឯងផ្ទាល់គួរដោះស្រាយបញ្ហានេះ ហើយតាមអ្វីដែលពួកយើងដឹង កម្លាំងនយោបាយមួយចំនួន បានប្រកាសការពុំឯកភាពរបស់ពួកគេ ។ ពួកគេនិយាយពីលទ្ធភាពនៃការបំពានការបោះឆ្នោត ។

ក្រុមមន្រ្តីរដ្ឋាភិបាលរុស្ស៊ី និយាយថា ពលរដ្ឋម៉ុលដូវីប្រហែល ៥០ម៉ឺននាក់ រស់នៅក្នុងប្រទេសរុស្ស៊ី ហើយយោងតាមការអះអាងរបស់ក្រុមអាជ្ញាធរម៉ុលដូវី បានឲ្យដឹងថា មានអ្នកបោះឆ្នោតជាង ៤ពាន់នាក់ប៉ុណ្ណោះ បានបោះឆ្នោតរបស់ពួកគេនៅក្នុងប្រទេសរុស្ស៊ី ៕