ក្រសួងការបរទេសអាមេរិក បាននិយាយកាលពីចុងសប្ដាហ៍កន្លងមកថា សហរដ្ឋអាមេរិក និងម៉ិកស៊ិក បានចាប់ផ្តើមគំនិតផ្តួចផ្តើមទ្វេភាគីថ្មីមួយ ក្នុងគោលបំណងទប់ស្កាត់លំហូរនៃការជួញដូរអាវុធខុសច្បាប់ឆ្លងកាត់ព្រំដែនរួមរបស់ប្រទេសទាំង២។

សេចក្តីប្រកាសនេះបានកើតមានឡើងក្នុងកិច្ចប្រជុំសម្ពោធក្រុមសន្តិសុខពិសេសអាមេរិក-ម៉ិកស៊ិក ដែលត្រូវបង្កើតឡើងនៅដើមខែនេះ ក្នុងអំឡុងដំណើរទស្សនកិច្ចរបស់រដ្ឋមន្ត្រីការបរទេស លោក Marco Rubio នៅម៉ិកស៊ិក ដើម្បីបង្កើនសកម្មភាពរួមគ្នា ប្រឆាំងនឹងការជួញដូរគ្រឿងញៀន និងការរត់ពន្ធអាវុធ។

ក្រសួងបានឲ្យដឹងទៀតថា ជាផ្នែកមួយនៃគំនិតផ្តួចផ្តើមថ្មី ម៉ិកស៊ិកនឹងពង្រីកការប្រើប្រាស់ឧបករណ៍តាមដានរបស់សហរដ្ឋអាមេរិក ដូចជា eTrace ជាដើម និងបច្ចេកវិទ្យាបញ្ជូនរូបភាពតាមអាកាសទៅកាន់រដ្ឋទាំង ៣២ ខណៈដែលប្រទេសទាំង២ នឹងបង្កើនការស៊ើបអង្កេតរួមគ្នា ការកាត់ទោស និងការចែករំលែកព័ត៌មានសម្ងាត់។

គំនិតផ្តួចផ្តើមនេះក៏អំពាវនាវឲ្យមានការស៊ើបអង្កេតទ្វេភាគីកាន់តែស៊ីជម្រៅ ការកាត់ទោសឲ្យកាន់តែច្រើនបន្ថែមទៀត និងការបង្កើនការត្រួតពិនិត្យរបស់សហរដ្ឋអាមេរិក ដើម្បីបញ្ឈប់ការរត់ពន្ធអាវុធតម្រង់ទៅភាគខាងត្បូង ដែលជាកត្តាជំរុញដ៏សំខាន់នៃការមានអំពើហិង្សារបស់ក្រុមអន្ធពាល នៅម៉ិកស៊ិក។

ឯកអគ្គរដ្ឋទូតសហរដ្ឋអាមេរិកប្រចាំប្រទេសម៉ិកស៊ិក លោក Ronald Johnson បានឲ្យដឹងនៅលើបណ្ដាញសង្គមថា៖ «ជាលើកដំបូងហើយ ដែលសហរដ្ឋអាមេរិក និងម៉ិកស៊ិក កំពុងអនុវត្តការត្រួតពិនិត្យរួមគ្នា ការចែករំលែកព័ត៌មានតាមពេលវេលាជាក់ស្តែង និងពង្រីកការស៊ើបអង្កេតបន្ថែម ដើម្បីរារាំងអាវុធកុំឲ្យធ្លាក់ទៅក្នុងដៃរបស់ក្រុមអន្ធពាល។ កិច្ចសហប្រតិបត្តិការជាប្រវត្តិសាស្ត្រនេះ គឺដើម្បីការពារប្រទេសទាំង២»៕