ក្រុមអាជ្ញាធរ និយាយថា ភ្លៀងធ្លាក់ខ្លាំងបានវាយប្រហារដងផ្លូវនៅតំបន់ Zaragoza និងតំបន់ Valencia របស់ប្រទេសអេស្ប៉ាញកាលពីថ្ងៃអាទិត្យ បង្ខំឲ្យសេវាកម្មសង្រ្គោះបន្ទាន់សង្រ្គោះមនុស្សជាប់ខ្លួនរាប់សិបនាក់ ។

ទីភ្នាក់ងារឧតុនិយមរដ្ឋអេស្ប៉ាញ(AEMET) បានចេញសេចក្តីប្រកាសអាសន្នកម្រិតពណ៌ក្រហមដែលជាកម្រិតខ្ពស់បំផុតសម្រាប់ថ្ងៃអាទិត្យ និងថ្ងៃចន្ទនេះ ពេលដែលព្យុះ Gabrielle គំរាមកំហែងបង្កភ្លៀងធ្លាក់ខ្លាំងនៅទូទាំងតំបន់ភាគខាងកើតអេស្ប៉ាញ ។

នៅតំបន់ Zaragoza មនុស្សមួយគ្រួសារត្រូវបានគេប្រទះឃើញនៅលើដំបូលផ្ទះរបស់ពួកគេ លើកកូនឲ្យក្រុមជួយសង្រ្គោះបន្ទាន់នៅលើទូកពោង ដែលដឹកពួកគេទៅកាន់ទីសុវត្ថិភាព ។

ការបោសសម្អាតភក់ និងកម្ទេចកម្ទីបន្សល់ពីភ្លៀងធ្លាក់ខ្លាំង បានចាប់ផ្តើមទាំងយប់ ហើយអ្នកស្រុកនិយាយថា ពួកគេមានការតក់ស្លុតយ៉ាងខ្លាំងដោយសារកម្លាំងព្យុះ រយៈពេលជិត ១ឆ្នាំ ចាប់តាំងពីទឹកជំនន់ដ៏គំហុកសម្លាប់មនុស្សជាង ២២០នាក់ នៅតំបន់ Valencia ។

ទីភ្នាក់ងារ AEMET រាយការណ៍ថា ទឹកភ្លៀងកម្ពស់ចន្លោះពី ១៦០មីលីម៉ែត្រ និង ២០០មីលីម៉ែត្រ បានធ្លាក់ក្នុងរយៈពេលពេល ៦-៨ម៉ោង ។

ក្រុមអាជ្ញាធរនិយាយថា ព្យុះស៊ីក្លូន Gabrielle បានវាយប្រហារកោះ Azores របស់ព័រទុយហ្គាល់កាលពីថ្ងៃសុក្រសប្តាហ៍មុនជាមួយកម្លាំងខ្យល់បក់ខ្សោយជាងការរំពឹងទុក ប៉ុន្តែវានៅបោកបងក់រំលើងដើមឈើ និងធ្វើឲ្យបាក់ដំបូលផ្ទះប្រជាពលរដ្ឋ ៕