ការផ្ទុះត្រូវបានគេមើលឃើញនៅតំបន់ហ្កាហ្សាពីតំបន់ភាគខាងត្បូងអ៊ីស្រាអែលនាព្រឹកថ្ងៃចន្ទនេះ ស្របពេលដែលរថក្រោះអ៊ីស្រាអែលរុលចូលកាន់តែជិតតំបន់ភាគកណ្តាលទីក្រុងហ្កាហ្សា និងរយៈពេលប៉ុន្មានម៉ោងប៉ុណ្ណោះ មុនពេលប្រធានាធិបតីសហរដ្ឋអាមេរិកលោក Donald Trump គ្រោងនឹងជួបនាយករដ្ឋមន្រ្តីអ៊ីស្រាអែលលោក Benjamin Netanyahu នៅសេតវិមាន ។

រថក្រោះអ៊ីស្រាអែលរុលចូលនៅថ្ងៃចន្ទនេះ នៅចម្ងាយប៉ុន្មានរយម៉ែត្រប៉ុណ្ណោះពីមន្ទីរពេទ្យធំ Al Shifa របស់ទីក្រុងហ្កាហ្សា ជាទីដែលគ្រូពេទ្យនិយាយថា អ្នកជំងឺរាប់រយនាក់ នៅត្រូវការព្យាបាល បើទោះបីជាមានការបញ្ជារបស់អ៊ីស្រាអែលឲ្យចាកចេញក៏ដោយ ។

ក្រុមមន្រ្តីសុខភាព និយាយថា រថក្រោះទាំងនេះ បានឡោមព័ទ្ធផងដែរតំបន់ជុំវិញមន្ទីរពេទ្យ Al Helo ដែលមានអ្នកជំងឺសម្រាកព្យាបាលប្រហែល ៩០នាក់ រួមទាំងទារក ១២នាក់ នៅក្នុងកែវផងដែរ ។ គ្រូពេទ្យនិយាយថា មន្ទីរពេទ្យនេះ រងការទម្លាក់គ្រាប់បែកកាលពីយប់កន្លងទៅ ។

អ៊ីស្រាអែលនិយាយថា ពួកគេនឹងមិនបញ្ឈប់ការប្រយុទ្ធនោះទេ លុះត្រាតែក្រុមហាម៉ាសដោះលែងចំណាប់ថ្នូរទាំងអស់ ហើយនិងទម្លាក់អាវុធរបស់ពួកគេចោល ។

មនុស្សរាប់ម៉ឺននាក់ បានរត់ភៀសខ្លួនចេញពីទីក្រុងហ្កាហ្សា បើទោះបីជាពួកគេមួយជំនួននិយាយថា គ្មានកន្លែងត្រូវទៅក៏ដោយ ។ អ៊ីស្រាអែលនិយាយប្រាប់ពួកគេឲ្យធ្វើដំណើរទៅកាន់តំបន់ភាគខាងត្បូង ជាទីដែលទីក្រុងជាច្រើន ត្រូវបានកម្ទេចចោលគ្មានសេសសល់ទៅហើយ ៕