មេធាវីបានប្រាប់អ្នកសារព័ត៌មានកាលពីថ្ងៃចន្ទ (២៩ កញ្ញា) ថា អតីតនាយករដ្ឋមន្ត្រីដ៏ចម្រូងចម្រាសរបស់ថៃ លោក ថាក់ស៊ីន ស៊ីណាវ៉ាត់ ដែលកំពុងតែជាប់ពន្ធនាគារ បានថ្វាយសំណើសុំរាជានុម័តលើកលែងទោសពីព្រះមហាក្សត្រថៃ ដើម្បីកាត់បន្ថយការជាប់ពន្ធនាគាររយៈពេល ១ឆ្នាំរបស់លោក។

លោក ថាក់ស៊ីន វ័យ ៧៦ឆ្នាំ គឺជាអ្នកនយោបាយដែលមានរឿងរ៉ាវចម្រូងចម្រាសបំផុតរបស់ប្រទេសនេះ ហើយកំពុងតែអនុវត្តទោស ១ឆ្នាំក្នុងពន្ធនាគារទីក្រុងបាងកក បន្ទាប់ពីតុលាការកំពូលថៃ បានសម្រេចក្នុងខែនេះថា ការអនុវត្តទោសកាលឆ្នាំ២០២៣ របស់លោក ធ្វើឡើងមិនបានត្រឹមត្រូវទេ ដោយពេលនោះលោកសម្រាកក្នុងមន្ទីរពេទ្យ ជំនួសឱ្យការនៅក្នុងបន្ទប់ពន្ធនាគារ។

លោក Winyat Chatmontree មេធាវីរបស់លោក ថាក់ស៊ីន បានប្រាប់អ្នកយកព័ត៌មានកាលពីថ្ងៃចន្ទ នៅខាងក្រៅពន្ធនាគារថា "ញត្តិ (សម្រាប់ការលើកលែងទោសពីព្រះមហាក្សត្រ) ត្រូវដាក់ថ្វាយទៅហើយ ប៉ុន្តែមិនអត្ថាធិប្បាយបន្ថែមពីរឿងនេះទេ"។ លោកបន្ថែមថា៖ សំណើសុំលើកលែងទោសបែបនេះជាសិទ្ធិរបស់អ្នកទោសគ្រប់រូប។ មេធាវីរូបនេះមិនបញ្ជាក់ឡើយថា តើសំណើនោះត្រូវបានដាក់តាំងតែពីពេលណាមក។

គួររម្លឹកថា ក្រោយត្រឡប់ពីនិរទេសខ្លួនទៅប្រទេសថៃវិញ នៅខែសីហា ឆ្នាំ២០២៣ លោក ថាក់ស៊ីន ត្រូវកាត់ទោសឱ្យជាប់ពន្ធនាគារ ៨ឆ្នាំពីបទពុករលួយ និងរំលោភអំណាច ប៉ុន្តែលោកមិនដែលចំណាយពេល ១យប់ក្នុងបន្ទប់ពន្ធនាគារសោះឡើយ។ លោកត្រូវបញ្ជូនទៅបន្ទប់វីអាយភីក្នុងមន្ទីរពេទ្យមួយបន្ទាប់ពីត្អូញត្អែរថាចុកទ្រូង ហើយក្រោយមក ការជាប់ទោសរបស់លោកត្រូវបន្ថយមកត្រឹម ១ឆ្នាំដោយព្រះមហាក្សត្រ ដោយបន្ទាប់មកទៀតក៏ត្រូវដោះលែង ជាផ្នែកនៃការដោះលែងអ្នកទោសវ័យចំណាស់។ តុលាការកំពូលបានសម្រេចនៅថ្ងៃទី៩ ខែកញ្ញា ថា ការអនុវត្តទោសជាប់ពន្ធនាគាររបស់លោកនៅពេលនោះជារឿងខុសច្បាប់ ហើយថា លោកមិនមានជំងឺធ្ងន់ធ្ងរអ្វីនោះទេ៕