លោកប្រធានាធិបតី Donald Trump បានជួបជាមួយសមាជិកជាន់ខ្ពស់នៃគណបក្សសាធារណរដ្ឋ និងគណបក្សប្រជាធិបតេយ្យនៅសេតវិមានកាលពីថ្ងៃចន្ទ ទី២៩ ខែកញ្ញា ដោយព្យាយាមពិនិត្យឡើងវិញនូវកិច្ចពិភាក្សានៃការចំណាយដែលជាប់គាំងដោយនៅសល់ពេលត្រឹមតែជាង៣0ម៉ោងទៀតប៉ុណ្ណោះ ដើម្បីបញ្ចៀសការបិទរដ្ឋាភិបាលសហរដ្ឋអាមេរិក។ លុះត្រាតែសភាអនុម័តសេចក្តីស្នើច្បាប់ផ្តល់មូលនិធិនៅមុនពាក់កណ្តាលអធ្រាត្រថ្ងៃអង្គារនេះ បើមិនដូច្នេះទេរដ្ឋាភិបាលនឹងបិទដោយផ្នែក ដោយបញ្ឈប់ប្រតិបត្តិការមិនសំខាន់ ដោយបន្សល់ទុកឱ្យបុគ្គលិកសហព័ន្ធរាប់ម៉ឺននាក់គ្មានប្រាក់ឈ្នួល និងធ្វើឲ្យប៉ះពាល់ដល់ការចំណាយផ្នែកសុខុមាលភាពសង្គមជាច្រើន។

សេតវិមាន បានបង្កើនភាពតានតឹងដោយព្រមានថាការកាត់រំសាយមន្ត្រីយ៉ាងច្រើនអាចធ្វើឡើងបន្ទាប់ពីការបិទរដ្ឋាភិបាល ដោយបញ្ចប់ការអនុវត្តធម្មតានៃការបញ្ឈប់បណ្តោះអាសន្នរហូតដល់កិច្ចព្រមព្រៀងមួយត្រូវបានឈានដល់។ រដ្ឋបាលរបស់លោក Trump កាលពីថ្ងៃចន្ទបានចាប់ផ្តើមបញ្ជាក់លម្អិតអំពីរបៀបដែលទីភ្នាក់ងារនឹងដំណើរការ ប្រសិនបើការផ្តល់មូលនិធិអស់សុពលភាព។

ការិយាល័យគ្រប់គ្រងបុគ្គលិកបាននិយាយថា ការបណ្ដុះបណ្ដាល និងការជាប់ពាក់ព័ន្ធជាមួយបុគ្គលិកថ្មីនឹងត្រូវបញ្ឈប់។ បុគ្គលិកឈប់សម្រាកពីការងារ នឹងអាចពិនិត្យមើលសារអេឡិចត្រូនិករបស់រដ្ឋាភិបាល សម្រាប់ការជូនដំណឹងអំពីការកាត់រំសាយ ជាចំណាត់ការថ្មីមួយដែលពុំត្រូវបានប្រើនៅក្នុងការបិទរដ្ឋាភិបាលមុន។

ព្រឹទ្ធសមាជិក លោក Gary Peters ដែលជាសមាជិកជាន់ខ្ពស់គណបក្សប្រជាធិបតេយ្យនៃគណៈកម្មាធិការព្រឹទ្ធសភាដែលត្រួតពិនិត្យប្រតិបត្តិការបិទរដ្ឋាភិបាលបានហៅផែនការនេះថា «ជ្រុលហួសហេតុ» ដោយព្រមានអំពីការខូចខាតយូរអង្វែងប្រសិនបើមន្ត្រីជំនាញត្រូវបានបណ្តេញចេញជាអចិន្ត្រៃយ៍។