> Kim: PUTIN ORDERS CALL-UP

លោកPutin បញ្ជាឱ្យកែណ្ឌកងទ័ពក្នុងរដូវស្លឹកឈើជ្រុះច្រើនបំផុត ចាប់តាំងពីឆ្នាំ ២០១៦

Putin orders biggest autumn army call-up since 2016

ប្រធានាធិបតីរុស្ស៊ី លោក Vladimir Putin កាលពីថ្ងៃចន្ទ ទី២៩ ខែកញ្ញា បានកែណ្ឌបុរសចំនួន ១៣៥.០០០នាក់ សម្រាប់ការបំពេញកាតព្វកិច្ចយោធា ជាការជំរុញការកែណ្ឌទាហាននៅក្នុងរដូវស្លឹកឈើជ្រុះច្រើនបំផុតរបស់ប្រទេសចាប់តាំងពីឆ្នាំ២០១៦មក។ ប្រទេសរុស្ស៊ីបានកែណ្ឌបុរសដែលមានអាយុចន្លោះពី១៨ឆ្នាំ ដល់៣០ឆ្នាំ សម្រាប់ការបំពេញកាតព្វកិច្ចយោធារៀងរាល់រដូវផ្ការីក និងរដូវស្លឹកឈើជ្រុះ។

ទាហានកែណ្ឌត្រូវបានគេរំពឹងថានឹងបម្រើការក្នុងរយៈពេលមួយឆ្នាំនៅមូលដ្ឋានយោធាមួយកន្លែងក្នុងប្រទេសរុស្ស៊ី ពុំមែនដើម្បីប្រយុទ្ធនៅក្នុងប្រទេសអ៊ុយក្រែនទេ ទោះបីជាមានសេចក្តីរាយការណ៍ពីទាហានដែលត្រូវបានកែណ្ឌថាត្រូវបានបញ្ជូនទៅសមរភូមិជួរមុខក៏ដោយ។ យុទ្ធនាការកែណ្ឌកងទ័ពប្រចាំឆ្នាំរបស់រុស្ស៊ី មិនទាក់ទងនឹងការចល័តកងទ័ពទេ ដែលក្នុងនោះបុរសជនជាតិរុស្ស៊ី ត្រូវបានកែណ្ឌដើម្បីប្រយុទ្ធក្នុងសម័យសង្គ្រាម។

ប៉ុន្តែទាហានកែណ្ឌ ដែលបានបញ្ចប់ការហ្វឹកហ្វឺនយោធា ទំនងជាត្រូវបានកោះហៅឱ្យឡើងប្រយុទ្ធនៅពេលអនាគត។ នៅក្នុងក្រិត្យមួយដែលបានចេញផ្សាយកាលពីថ្ងៃច័ន្ទ លោក Putin បានបញ្ជាឱ្យ «កែណ្ឌពលរដ្ឋចំនួន ១៣៥.០០០នាក់របស់សហព័ន្ធរុស្ស៊ី ចាប់ពីថ្ងៃទី១ ខែតុលា ដល់ថ្ងៃទី៣១ ខែធ្នូ ឆ្នាំ២០២៥»។ នេះគឺជាការកែណ្ឌក្នុងរដូវស្លឹកឈើជ្រុះដ៏ច្រើនបំផុតចាប់តាំងពីឆ្នាំ២០១៦មក ហើយរួមជាមួយនឹង មនុស្ស១៦០.០០០នាក់ដែលត្រូវបានកែណ្ឌកាលពីនិទាឃរដូវ មានន័យថាឆ្នាំ២០២៥ ត្រូវបានកំណត់ថាជាការកែណ្ឌសរុបច្រើនបំផុត។ ប្រទេសរុស្ស៊ីជាធម្មតា កែណ្ឌបុរសបន្ថែមនៅក្នុងយុទ្ធនាការនិទាឃរដូវនៅចន្លោះខែមេសា ដល់ខែកក្កដា នៅពេលដែលមនុស្សភាគច្រើនបានបញ្ចប់ការសិក្សាពីសាលា ឬមហាវិទ្យាល័យ។