បាល់ទាត់៖ ខ្សែប្រយុទ្ធ ២រូបដែលតែងបង្កព្យុះភ្លៀងលើសមរភូមិវាលស្មៅនៃលីគកំពូលកម្ពុជា រួមមានកីឡាករ ដាវ នីម និងកីឡាករប្រេស៊ីល Eliel da Cruz Guardiano ទំនងចុះកុងត្រាជាមួយក្រុមណាហ្គាវើលដ៏រួចរាល់ហើយ ដើម្បីត្រៀមរដូវកាលថ្មីឆ្នាំ២០២២ ខាងមុខ។
ទោះបីក្រុមរហស្សនាមនាគមាសមួយនេះពុំទាន់ប្រកាសសមាជិកថ្មីទាំង ២រូបក្ដី តែដោយយោងតាមរូបភាពផ្សព្វផ្សាយក្នុងឱកាសបុណ្យចូលឆ្នាំចិនរបស់អតីតក្រុមជើងឯកលីគ ៣សម័យនេះបានបង្ហាញរូបភាពកីឡាករ ដាវ នីម និង Da Cruz នៅលើរូបភាពផ្សព្វផ្សាយរបស់ខ្លួន។ តាមរយៈនេះបានធ្វើឲ្យអ្នកគាំទ្រជឿជាក់ថា ខ្សែប្រយុទ្ធទាំងពីរច្បាស់ជាចូលរួមជាមួយក្រុមណាហ្គាវើលដ៏ នារដូវកាលថ្មីជាក់ជាមិនខាន។ គួរដឹងថា ដាវ នីម គឺជាអតីតសមាជិកក្រុមគិរីវង់តាំងពីឆ្នាំ២០១៦ មុនក្លិបមានមូលដ្ឋាននៅខេត្តតាកែវមួយនេះ ប្រកាសចែកផ្លូវ ក្រោយបញ្ចប់រដូវកាលឆ្នាំ២០២១ កន្លងទៅ។ រីឯ Da Cruz គឺជាកីឡាករបរទេសដ៏មានបទពិសោធន៍មួយរូប ដែលធ្លាប់ចំណាយពេល ២រដូវកាលមកហើយក្នុងក្របខណ្ឌលីគកំពូលកម្ពុជា ដោយធ្លាប់លេងឲ្យវិសាខាកាលពីឆ្នាំ២០១៩ និងលេងឲ្យអង្គរថាយហ្គឺរកាលពីឆ្នាំ២០២១ កន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
