ទីភ្នាក់ងាររៀបចំផែនការរបស់រដ្ឋ បាននិយាយកាលពីថ្ងៃចន្ទ (២៩ កញ្ញា) ថា ប្រទេសចិន នឹងដាក់ពង្រាយវិធានការហិរញ្ញវត្ថុផ្អែកលើគោលនយោបាយ ដែលមានតម្លៃ ៥០០ពាន់លានយ័ន (៧០,២៥ ពាន់លានដុល្លារអាមេរិក) ដើម្បីពន្លឿនគម្រោងវិនិយោគ ដែលជាផ្នែកនៃកិច្ចខិតខំប្រឹងប្រែងដើម្បីគាំទ្រដល់សេដ្ឋកិច្ចរបស់ប្រទេស។

លោកស្រី Li Chao អ្នកនាំពាក្យគណៈកម្មាធិការកំណែទម្រង់ និងអភិវឌ្ឍន៍ជាតិរបស់ចិន បាននិយាយថា អាជ្ញាធរកំពុងប្រើប្រាស់ឧបករណ៍ហិរញ្ញប្បទានថ្មី ដើម្បីបង្កើនសេវាកម្មហិរញ្ញវត្ថុ និងការវិនិយោគប្រកបដោយប្រសិទ្ធភាព។ លោកស្រី Li ប្រាប់សន្និសីទសារព័ត៌មានមួយថា "ក្រុមការងារកំពុងធ្វើការជាមួយភាគីពាក់ព័ន្ធដើម្បីបែងចែកថវិកាភ្លាមៗពីវិធានការហិរញ្ញវត្ថុផ្អែកលើគោលនយោបាយថ្មីទាំងនេះទៅកាន់គម្រោងជាក់លាក់"។

លោក Ting Lu ប្រធានសេដ្ឋវិទូចិនប្រចាំក្រុមហ៊ុន Nomura បាននិយាយក្នុងកំណត់ត្រាស្រាវជ្រាវមួយនៅថ្ងៃអង្គារនេះថា មូលនិធិថ្មីដែលអាចមកពីធនាគារកណ្តាល ឬទីផ្សារមូលបត្របំណុលនោះ អាចបង្កើនរហូតដល់ ៥សែនកោដិយ័ន ក្នុងប៉ុន្មានឆ្នាំខាងមុខ ប៉ុន្តែផលជះជាក់ស្តែងអាចមានទំហំតូច និងយឺតជាងមុន ដោយសារក្ដីបារម្ភពីបំណុលក្នុងស្រុក។

របាយការណ៍ប្រព័ន្ធផ្សព្វផ្សាយក្នុងស្រុកបាននិយាយថា មូលនិធិនេះនឹងត្រូវប្រើប្រាស់ជាដើមទុនសាបព្រួសគ្រាប់ពូជសម្រាប់គម្រោងក្នុងវិស័យនានា រួមមានសេដ្ឋកិច្ចឌីជីថល បញ្ញាសិប្បនិម្មិត AI សេដ្ឋកិច្ចកំពុងរីកចម្រើន ហេដ្ឋារចនាសម្ព័ន្ធប្រើប្រាស់ ការដឹកជញ្ជូន និងភស្តុភារជាដើម៕