ប្រភពមន្ត្រីហាម៉ាសម្នាក់បាននិយាយកាលពីថ្ងៃចន្ទ (២៩ កញ្ញា) ថា នាយករដ្ឋមន្ត្រីកាតា និងប្រមុខចារកម្មអេហ្ស៊ីប បានជួបជាមួយក្រុមចរចារបស់ចលនាហាម៉ាស ហើយបានប្រគល់ផែនការសន្តិភាព ២០ចំណុច របស់លោកប្រធានាធិបតីអាមេរិក Donald Trump ទៅឱ្យក្រុមនេះរួចហើយ ជុំវិញការបញ្ចប់សង្គ្រាមតំបន់ហ្កាហ្សា ខណៈអ៊ីស្រាអែល ព្រមានដល់ក្រុមប៉ាឡេស្ទីននេះឱ្យព្រមទទួលយកសំណើ។

ក្រុមអ្នកចរចារបស់ហាម៉ាស និយាយថា ពួកគេកំពុងពិនិត្យមើលលម្អិតនៃសំណើប្រកបដោយសុច្ឆន្ទៈ និងផ្តល់ការឆ្លើយតបវិញ។ ទូរទស្សន៍ Al Qahera News TV របស់អេហ្ស៊ីប ដែលដកស្រង់ប្រភពសន្តិសុខអេហ្ស៊ីប បានបញ្ជាក់ពីការប្រគល់សំណើសន្តិភាពរបស់អាមេរិក ដល់ដៃក្រុមហាម៉ាស ហើយបាននិយាយថា អេហ្ស៊ីប និងប្រទេសអារ៉ាប់ផ្សេងទៀត បានធ្វើវិសោធនកម្មជាច្រើនលើកចំពោះផែនការនេះ មុនពេលប្រគល់ឱ្យក្រុមហាម៉ាស នៅទីក្រុងដូហា។

ផែនការ ២០ចំណុចរបស់លោក Trump ត្រូវបានបើកបង្ហាញកាលពីថ្ងៃចន្ទ ហើយលោកនាយករដ្ឋមន្ត្រីអ៊ីស្រាអែល Benjamin Netanyahu បានដាក់គាំទ្រយ៉ាងពេញទំហឹងនៅពីក្រោយផែនការនោះ ក្នុងសន្និសីទសារព័ត៌មានរួមមួយនៅសេតវិមាន ជាទីដែលលោកចេញការព្រមានជាថ្មីដល់ពួកហាម៉ាស។

លោក Trump និយាយថា ប្រសិនបើក្រុមហាម៉ាស ទទួលយកសំណើ នោះនឹងតម្រូវឱ្យដោះលែងចំណាប់ថ្នូរនៅសល់ទាំងអស់ក្នុងពេល ៧២ម៉ោង ហើយអំពាវនាវឱ្យហាម៉ាសទទួលយកលក្ខខណ្ឌទាំងអស់។ ចំណែកលោក Netanyahu វិញបានព្រមានខ្លាំងៗថា អ៊ីស្រាអែលនឹង "បញ្ចប់ការងារ" ប្រឆាំងនឹងក្រុមហាម៉ាស ប្រសិនបើពួកសកម្មប្រយុទ្ធបដិសេធសំណើមួយនេះ៕