រដ្ឋមន្ត្រីក្រសួងមហាផ្ទៃទួរគី លោក Ali Yerlikaya បាននិយាយកាលពីថ្ងៃចន្ទថា ប្រជាជនស៊ីរីសរុបចំនួន ៥០៩,៣៨៧នាក់ បានត្រឡប់ទៅប្រទេសរបស់ពួកគេវិញ តាមរយៈដំណើរការវិលត្រឡប់មកវិញដោយស្ម័គ្រចិត្ត បន្ទាប់ពីការដួលរលំនៃរបបរបស់អតីតប្រធានាធិបតីស៊ីរីលោក បាសា អាល់អាសាដ ( Bashar al-Assad) ក្នុងខែធ្នូ ឆ្នាំ ២០២៤។

លោក Yerlikaya បានសរសេរនៅលើវេទិកាប្រព័ន្ធផ្សព្វផ្សាយសង្គម Xថា ទួរគីបន្តគាំទ្រជនជាតិស៊ីរី ក្នុងអំឡុងពេលត្រឡប់មកវិញដោយស្ម័គ្រចិត្តរបស់ពួកគេ ដោយបន្ថែមថា ការត្រឡប់មកវិញ បានកើនឡើងយ៉ាងលឿន បន្ទាប់ពីការវិវត្តថ្មីៗ នៅក្នុងប្រទេសស៊ីរី។

យោងតាមលោកបានឲ្យដឹងថា ប្រជាជនស៊ីរីជិត ១.២៥០.000 នាក់ បានស្ម័គ្រចិត្តត្រឡប់ទៅស្រុកកំណើតរបស់ពួកគេវិញ ចាប់តាំងពីឆ្នាំ ២០១៦។

លោកបានចង្អុលបង្ហាញថា មជ្ឈមណ្ឌលសំខាន់មួយ ដែលសម្របសម្រួលការវិលត្រឡប់ទាំងនេះ គឺមជ្ឈមណ្ឌលសម្របសម្រួលការវិលត្រឡប់មកវិញដោយស្ម័គ្រចិត្ត នៅក្នុងស្រុក Saricam នៃខេត្ត Adana ភាគខាងត្បូង ជាកន្លែងដែលប្រជាជនស៊ីរីបំពេញនីតិវិធីរបស់ពួកគេ មុនពេលធ្វើដំណើរទៅប្រទេសកំ ណើត។

ប្រជាជនស៊ីរីរាប់លាននាក់ បានភៀសខ្លួនចេញពីប្រទេសរបស់ពួកគេ បន្ទាប់ពីការផ្ទុះសង្រ្គាមស៊ីវិល ក្នុងឆ្នាំ ២០១១។ ទួរគី ដែលមានព្រំដែនដ៏វែងជាមួយប្រទេសស៊ីរី ទទួលជនភៀសខ្លួនស៊ីរីប្រមាណ ២,៧ លាននាក់។ នេះបើយោងតាមតួលេខផ្លូវការដែលបានចេញផ្សាយ នៅក្នុងខែឧសភា៕