រដ្ឋមន្ត្រីការបរទេសកាតា បាននិយាយថា នាយករដ្ឋមន្ត្រី និងជារដ្ឋមន្ត្រីការបរទេសកាតាលោក Mohammed bin Abdulrahman Al-Thani បានសន្ទនាតាមទូរស័ព្ទជាមួយប្រធានាធិបតីអាមេរិក លោក ដូណាល់ ត្រាំ (Donald Trump) និងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu)។

ក្នុងអំឡុងពេលសន្ទនា លោកនាយករដ្ឋមន្ត្រីកាតា បានបង្ហាញពីការត្រៀមខ្លួននៃប្រទេសរបស់លោក ក្នុងការបន្តចូលរួមក្នុងកិច្ចខិតខំប្រឹងប្រែង ដើម្បីបញ្ចប់សង្គ្រាមនៅតំបន់ហ្កាហ្សាស្ទ្រីប ក្នុងក្របខ័ណ្ឌនៃគំនិតផ្តួចផ្តើមរបស់ប្រធានាធិបតីអាមេរិក ដែលឆ្លុះបញ្ចាំងពីវិធីសាស្រ្តជាប់លាប់របស់កាតា ក្នុងការដោះស្រាយវិបត្តិតាមរយៈមធ្យោបាយការទូត និងស្របតាមតួនាទីរបស់ខ្លួន ក្នុងការលើកកម្ពស់សន្តិសុខ និងស្ថិរភាពក្នុងតំបន់។

យោងតាមសេចក្តីថ្លែងការណ៍នោះ លោក ណេតាន់យ៉ាហ៊ូ បានសុំការអភ័យទោសចំពោះការវាយប្រហារលើទីក្រុង Doha និងលើអធិបតេយ្យភាពរបស់ប្រទេសកាតា ដែលបណ្តាលឲ្យមន្ត្រីសន្តិសុខកាតាម្នាក់ ស្លាប់។ លោកនាយករដ្ឋមន្ត្រីអ៊ីស្រាអែល បានសន្យាថា ការវាយប្រហារស្រដៀងគ្នានេះ នឹងមិនកើតមានឡើងម្តងទៀតទេ នៅពេលអនាគត៕