ឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញជាអធិបតីភាពប្រគល់កុំព្យូទ័រយួរដៃ (Laptop) ចំនួន ៥១ គ្រឿង ជូនដល់រដ្ឋបាលឃុំ-សង្កាត់ទាំង ៥១ ក្នុងខេត្ត ដើម្បីប្រើប្រាស់បម្រើការងារផ្ដល់សេវាតាមប្រព័ន្ធឌីជីថល ដែលជាគម្រោងអាហារូបត្ថម្ភនៅកម្ពុជា។ ពិធីដ៏មានសារៈសំខាន់នេះ ត្រូវបានរៀបចំឡើងនៅព្រឹកថ្ងៃទី៣០ ខែកញ្ញា ឆ្នាំ២០២៥ នាសាលប្រជុំសាលាខេត្តព្រះវិហារ។

ថ្លែងក្នុងឱកាសនោះ ឯកឧត្តមអភិបាលខេត្ត បានគូសបញ្ជាក់អំពីសារៈប្រយោជន៍ ចំពោះកុំព្យូទ័រយួរដៃទាំងនេះ ដោយអំពាវនាវដល់អាជ្ញាធរឃុំ-សង្កាត់ ឲ្យយកចិត្តទុកដាក់ ថែទាំ និងប្រើប្រាស់កុំព្យូទ័រទាំង ៥១គ្រឿងនេះ ឱ្យចំគោលដៅ។ គោលបំណងសំខាន់ គឺសម្រាប់រៀបចំរបាយការណ៍មូលនិធិគាំទ្រការផ្ដល់សេវាឃុំ-សង្កាត់តាមប្រព័ន្ធឌីជីថល ដើម្បីងាយស្រួលតាមដានវឌ្ឍនភាព នៃការអនុវត្តកម្មវិធីឃុំ-សង្កាត់ សម្រាប់ស្ដ្រី និងកុមារ ប្រកបដោយប្រសិទ្ធភាព និងជំរុញការអនុវត្តគម្រោងអាហារូបត្ថម្ភនៅកម្ពុជាថ្នាក់ខេត្ត ក្រុង ស្រុក និងឃុំ-សង្កាត់ ឱ្យទទួលបានជោគជ័យ។

ក្រៅពីការផ្ដល់សម្ភារៈបច្ចេកវិទ្យា ឯកឧត្តម គីម រិទ្ធី ក៏បានជំរុញដល់អាជ្ញាធរក្រុង-ស្រុក ឃុំ-សង្កាត់ និងមន្ត្រីជំនាញទាំងអស់ ឱ្យយកចិត្តទុកដាក់ខ្ពស់លើពលករកម្ពុជា ដែលទើបត្រឡប់មកពីប្រទេសថៃ និងជំរុញលើការផ្សព្វផ្សាយអំពីកម្មវិធីស្វែងរកការងារធ្វើ របស់ក្រសួងការងារ និងបណ្ដុះបណ្ដាលវិជ្ជាជីវៈ ក៏ដូចជាជួយសម្របសម្រួលក្នុងការចេញឯកសារ បញ្ជាក់អត្តសញ្ញាណជូនពួកគាត់ ដែលរួមមាន៖ អត្តសញ្ញាណបណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅ និងសំបុត្រកំណើតជាដើម។

ទន្ទឹមនេះដែរ ឯកឧត្តមក៏បានសង្កត់ធ្ងន់លើក្រុមការងារកំណត់អត្តសញ្ញាណ ដែលដឹកនាំដោយ មេឃុំ ចៅសង្កាត់ និងមាននាយប៉ុស្ដិ៍នគរបាលរដ្ឋបាលឃុំ-សង្កាត់ ស្មៀនឃុំ-សង្កាត់ និងមេភូមិ ត្រូវយកចិត្តទុកដាក់ខ្ពស់ក្នុងការអនុវត្តតាម សេចក្ដីណែនាំលេខ ០៥០ សនណ ចុះថ្ងៃទី២៧ ខែសីហា ឆ្នាំ២០២៥ របស់ក្រសួងមហាផ្ទៃ ស្តីពីការជំរុញការផ្ដល់ឯកសារបញ្ជាក់អត្តសញ្ញាណជូនប្រជាពលរដ្ឋខ្មែរ ដែលទើបវិលត្រឡប់មកពីថៃ និងប្រជាពលរដ្ឋខ្មែរដែលពុំទាន់មានឯកសារគ្រប់គ្រាន់។