ការវាយប្រហារមីស៊ីលដោយក្រុមឧទ្ទាមហ៊ួទីនៅប្រទេសយេម៉ែន បានបង្កឲ្យឆេះនាវាដឹកទំនិញដែលមានទង់ជាតិហូឡង់ នៅឈូងសមុទ្រ Aden កាលពីថ្ងៃចន្ទ ដោយបានធ្វើឲ្យទាហានជើងទឹកពីរនាក់ រងរបួស និងបង្ខំនាវិកឲ្យបោះបង់ចោលនាវាដែលរងការខូចខាតនោះ។

នេះគឺជាការវាយប្រហារដ៏ធ្ងន់ធ្ងរបំផុត នៅឈូងសមុទ្រ Aden នៅមិនឆ្ងាយពីសមុទ្រក្រហម ជាកន្លែងដែលក្រុមហ៊ួទីគាំទ្រដោយអ៊ីរ៉ង់ បានពន្លិចនាវាពីរគ្រឿង កាលពីខែកក្កដា។

ខណៈពេលដែលក្រុមឧទ្ទាមមិនបានអះអាងពីការវាយលុកលើនាវា Minervagracht ពួកគេបានគំរាម វាយប្រហារនាវា ជាផ្នែកនៃយុទ្ធនាការរបស់ពួកគេលើសង្គ្រាមអ៊ីស្រាអែល-ហាម៉ាស នៅតំបន់ហ្កាហ្សាស្ទ្រីប ជាពិសេសនៅពេលដែលអ៊ីស្រាអែល បានវាយលុកលើទីក្រុងហ្កាហ្សា នៅក្នុងការវាយលុកថ្មើរជើងថ្មីមួយ។ ទន្ទឹមនឹងនោះ មជ្ឈិមបូព៌ាក៏នៅតែស្ថិតក្នុងស្ថានភាពគួរឲ្យព្រួយបារម្ភ បន្ទាប់ពីអង្គការសហប្រជាជាតិដាក់ទណ្ឌកម្មឡើងវិញលើអ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួន។

នាវា Minervagracht ត្រូវបានគេកំណត់គោលដៅ កាលពីថ្ងៃទី ២៣ ខែកញ្ញា ក្នុងការវាយប្រហារមិនបានសម្រេច នៅឈូងសមុទ្រ Aden ដែលតភ្ជាប់ទៅសមុទ្រក្រហម តាមរយៈច្រកសមុទ្រ Bab el-Mandeb ដែលបំបែកអាហ្វ្រិកខាងកើតពីឧបទ្វីបអារ៉ាប់៕