​កំពង់ឆ្នាំង ៖ អតីតយុទ្ធជនរស់នៅក្នុងភូមិកាខុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង នៅថ្ងៃទី៣០ ខែកញ្ញា នេះ បានសំដែងនូវការសប្បាយរីករាយ ក្រោយពីឃើញផលដំណាំរួមផ្សំរបស់គេ ដែលខិតខំដាំជិត បីឆ្នាំកន្លងមកនេះ បានចេញផ្លែផ្កាលក់បានកម្រៃជាបណ្តើរៗ ធ្វើឱ្យជីវភាពគ្រួសារពួកគេ បានធូរធារជាង ពេលមុនមួយកម្រិត។

​អតីតយុទ្ធជនបានឱ្យដឹងថា អតីតយុទ្ធជនទាំងអស់ បានទទួលដី និងផ្ទះរបស់សមាគមអតីតយុទ្ធជនពីសម្តេចតេជោ ហ៊ុន សែន ប្រធានសមាគមអតីតយុទ្ធជន អតីតនាយករដ្ឋមន្ត្រី នៃព្រះរាជាណាចក្រកម្ពុជា តាមរយៈឯកឧត្តមកិត្តិសង្គហបណ្ឌិត គន់ គីម អគ្គលេខាធិការសមាគមអតីតយុទ្ធជន, ឯកឧត្តម ស៊ុន សុវណ្ណារិទ្ធិ ប្រធានកិត្តិយសសមាគមអតីតយុទ្ធជន និងលោកឧត្តមសេនីយ៍ត្រី អ៊ុំ សុភា ប្រធានសមាគមអតីតយុទ្ធជនខេត្តកំពង់ឆ្នាំង ចំនួន១ម៉ឺន៥រយម៉ែត្រការ៉េក្នុង១គ្រួសារ។ ក្រោយទទួលបានភ្លាម អតីតយុទ្ធជន បានខិតខំដាំដំណាំយុទ្ធសាស្ត្រ និងដំណាំរួមផ្សំជាច្រើនប្រភេទ ដែលពេលនេះ ពួកគាត់បានផល និងលក់បានថវិកាមួយចំនួនគ្រាន់ដោះស្រាយជីវភាពបណ្តើរៗហើយ។ ដំណាំយុទ្ធសាស្ត្រ និងដំណាំរួមផ្សំផ្សេងទៀត នឹងហុចផលអោយជាបន្តបន្ទាប់ ហើយនៅថ្ងៃក្រោយ គ្រួសារពួកគាត់មិនលំបាករឿងលុយកាក់ទៀតឡើយ។

អតីតយុទ្ធជនថា ដីនៅទីតាំងនោះ មានជីជាតិល្អ និងសំណូមពរដល់អតីតយុទ្ធជនទាំងអស់ដែលមិនទាន់បានដាំដុះ សូមខិតខំដាំដុះដំណាំជុំវិញផ្ទះ ដើម្បីទ្រទ្រង់ជីវភាពអោយប្រសើរឡើង។ គាត់បានថ្លែងអំណរគុណយ៉ាងជ្រៀលជ្រៅ ចំពោះសម្តេចតេជោ ហ៊ុន សែន ប្រធានសមាគមអតីតយុទ្ធជន ដែលបានជួយគ្រួសារគាត់ឱ្យមានជីវភាពល្អដូចថ្ងៃនេះ។

​ឯកឧត្តម ស៊ុន សុវណ្ណារិទ្ធិ អភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្តកំពង់ឆ្នាំង បានថ្លែងថា៖ គោលបំណងរបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន គឺបង្ហាញពីការយកចិត្តទុកដាក់ខ្ពស់ ចំពោះអតីតយុទ្ធជនទាំងអស់ ដោយមិនទុកឱ្យកងកម្លាំងប្រដាប់អាវុធចូលនិវត្តន៍ណាម្នាក់ នៅឯកោ និងរស់នៅដោយលំបាកឡើយ។ គ្រួសារអតីតយុទ្ធជនខេត្តកំពង់ឆ្នាំង បានសាទរ និងគាំទ្រ ចំពោះការយកចិត្តទុកដាក់របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា ដែលសម្តេចតែងតែគិតគូរជួយដល់អ្នកចូលនិវត្ដន៍ទាំងអស់ រួមទាំងមន្ត្រីរាជការស៊ីវិល និងកងកម្លាំងប្រដាប់អាវុធដែលចូលនិវត្តន៍ ដើម្បីឱ្យពួកគាត់រស់នៅមានជីវភាពធូរធារ៕

អត្ថបទ៖ កាំង ហុងវាស្នា ​