កាសែត New York Times បានរាយការណ៍នៅថ្ងៃអង្គារ (៣០ កញ្ញា) នេះដោយសម្អាងដល់មន្ត្រីជាន់ខ្ពស់អ៊ីរ៉ង់ ២រូបដែលពាក់ព័ន្ធនឹងការចរចា និងមន្ត្រីអាមេរិកម្នាក់ដែលដឹងពីផែនការនេះថា សហរដ្ឋអាមេរិក កំពុងនិរទេសជនជាតិអ៊ីរ៉ង់ប្រហែល ១០០នាក់ ត្រឡប់ទៅប្រទេសកំណើតពួកគេនៅអ៊ីរ៉ង់វិញ។

យោងតាមរបាយការណ៍បានឱ្យដឹងថា មន្ត្រីអ៊ីរ៉ង់បាននិយាយថា ជើងហោះហើរដែលជួលជាលក្ខណៈឯកជនដោយសហរដ្ឋអាមេរិក បានហោះចេញពីរដ្ឋ Louisiana កាលពីថ្ងៃចន្ទ ហើយគ្រោងនឹងទៅដល់អ៊ីរ៉ង់ តាមច្រកកាតា នៅពេលណាមួយក្នុងថ្ងៃអង្គារនេះ។

ប្រភពមន្ត្រីអាមេរិកបញ្ជាក់ថា ផែនការសម្រាប់ការហោះហើរគឺស្ថិតក្នុងដំណាក់កាលចុងក្រោយហើយ។ កាសែតនេះបាននិយាយថា អត្តសញ្ញាណជនជាតិអ៊ីរ៉ង់ និងហេតុផលរបស់ជនទាំងនោះសម្រាប់ការប៉ុនប៉ងធ្វើអន្តោប្រវេសន៍ចូលទៅសហរដ្ឋអាមេរិក នៅមិនទាន់ច្បាស់ទេ។

នេះជាជំហានដ៏កម្រនៃកិច្ចសហប្រតិបត្តិការដោយផ្ទាល់រវាងរដ្ឋាភិបាលទាំងពីរ ដែលកើតឡើងតែប៉ុន្មានខែប៉ុណ្ណោះបន្ទាប់ពីលោកប្រធានាធីបតី Donald Trump បញ្ជាឱ្យវាយប្រហារទីតាំងនុយក្លេអ៊ែរអ៊ីរ៉ង់។

រដ្ឋាភិបាលអាមេរិកមុនៗ បានផ្តល់កន្លែងជ្រកកោនដល់ជនជាតិអ៊ីរ៉ង់ ដែលភៀសខ្លួនពីរបបសិទ្ធិមនុស្សដ៏ឃោរឃៅបំផុតមួយរបស់ពិភពលោក។ ក្នុងប៉ុន្មានឆ្នាំចុងក្រោយនេះ ប្រជាជនអ៊ីរ៉ង់ កាន់តែច្រើនបានឆ្លងព្រំដែនភាគខាងត្បូងអាមេរិកដោយខុសច្បាប់។ មនុស្សជាច្រើនបានសម្ដែងភាពភ័យខ្លាចនៃការធ្វើទុក្ខបុកម្នេញនៅប្រទេសកំណើតពួកគេ ដោយសារតែជំនឿនយោបាយ និងសាសនា៕