លោកប្រធានាធិបតី Donald Trump បានរិះគន់សម្ព័ន្ធមិត្តអឺរ៉ុបសំខាន់ៗរបស់សហរដ្ឋអាមេរិក ជុំវិញការទទួលស្គាល់ជាផ្លូវការនូវភាពជារដ្ឋរបស់ប៉ាឡេស្ទីន។

គួរជ្រាបថា ប្រទេសជាច្រើន ដែលរួមមានទាំងបារាំង អង់គ្លេស កាណាដា និងអូស្ត្រាលី បានទទួលស្គាល់រដ្ឋប៉ាឡេស្ទីន ក្នុងអំឡុងសម័យប្រជុំមហាសន្និបាតអង្គការសហប្រជាជាតិ (UNGA) កាលពីសប្តាហ៍មុន ជាចំណាត់ការដែលនាំឲ្យមានការថ្កោលទោសពីសហរដ្ឋអាមេរិក និងអ៊ីស្រាអែល។

អំឡុងសន្និសីទសារព័ត៌មានជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅសេតវិមាន កាលពីថ្ងៃចន្ទ (ទី២៩ ខែកញ្ញា) លោក Trump បាននិយាយថា៖ «ប្រទេសជាច្រើនបានសម្រេចទទួលស្គាល់រដ្ឋប៉ាឡេស្ទីន ដោយមិនគិតមុខគិតក្រោយអ្វីសោះ»។ យ៉ាងណាក្ដី លោកបានបន្ថែមថា៖ «ប៉ុន្តែខ្ញុំគិតថា ការធ្វើបែបនោះ ព្រោះប្រទេសទាំងនោះ ពិតជាធុញទ្រាន់នឹងអ្វីដែលកំពុងកើតឡើងជាច្រើនទសវត្សរ៍មកនេះ»។

នាថ្ងៃចន្ទនោះដែរ លោក Trump បានប្រកាសនូវផែនទីបង្ហាញផ្លូវ ២០ចំណុចរបស់លោកឆ្ពោះទៅកាន់សន្តិភាព ដែលអំពាវនាវឲ្យមានការរំសាយអាវុធរបស់ក្រុមហាម៉ាស ការដោះដូរចំណាប់ថ្នូរអ៊ីស្រាអែលនៅសល់ជាមួយអ្នកទោសប៉ាឡេស្ទីន និងការបង្កើតរដ្ឋាភិបាលអន្តរកាល នៅតំបន់ហ្កាហ្សា។ ហើយលោក Netanyahu បានថ្លែងអំណរគុណដល់លោក Trump ដែលបានប្រកាន់យកនូវ «ជំហរដ៏ម៉ឺងម៉ាត់ដែលអាជ្ញាធរប៉ាឡេស្ទីនមិនអាចមានតួនាទីអ្វីទាំងអស់ នៅតំបន់ហ្កាហ្សា»។ តែស្របពេលជាមួយគ្នា លោកបានព្រមានថា អ៊ីស្រាអែល «នឹងបញ្ចប់កិច្ចការ» របស់ខ្លួន ប្រសិនបើក្រុមហាម៉ាសបដិសេធកិច្ចព្រមព្រៀងនេះ។

គួរបញ្ជាក់ថា រដ្ឋអឺរ៉ុបជាច្រើនបានអះអាងថា ការទទួលស្គាល់ប៉ាឡេស្ទីន បញ្ជាក់ពីដំណោះស្រាយរដ្ឋ២ ហើយអាចជួយជំរុញដល់ដំណើរការសន្តិភាព នៅតំបន់ហ្កាហ្សា ជាទីដែលប្រជាជនប៉ាឡេស្ទីនជាង ៦៦.០០០នាក់ ត្រូវបានសម្លាប់ ចាប់តាំងពីខែតុលា ឆ្នាំ២០២៣ ហើយមនុស្សផ្សេងទៀតស្ទើរតែទាំងអស់ ត្រូវបម្លាស់ទីលំនៅ៕