អាជ្ញាធរតាលីបង់កាលពីថ្ងៃចន្ទ (ទី២៩ ខែកញ្ញា) បានបិទបណ្ដាញទំនាក់ទំនងទូទាំងប្រទេស ពោលគឺប៉ុន្មានសប្តាហ៍បន្ទាប់ពីក្រុមនេះបានចាប់ផ្តើមកាត់ផ្តាច់ការតភ្ជាប់ខ្សែកាបអុបទិក ជាចំណាត់ការដែលត្រូវបានធ្វើឡើងដើម្បីការពារនូវអ្វីដែលត្រូវបានចាត់ទុកថា «អំពើអសីលធម៌»។

ដំណើរការប្រព័ន្ធអ៊ីនធឺណិតកំពុងប្រព្រឹត្តទៅតិចជាង ១ភាគរយនៃកម្រិតធម្មតា។ នេះបើតាមការឲ្យដឹងពីស្ថាប័នតាមដានការប្រើប្រាស់ប្រព័ន្ធអ៊ីនធឺណិត Netblocks ដែលបានហៅការបិទនេះថា ជា «ការដាច់យ៉ាងទូលំទូលាយ ឬទាំងស្រុងតែម្ដង»។ នៅប៉ុន្មាននាទីមុនដំណើរការផ្ដាច់នោះកើតឡើង មន្ត្រីរដ្ឋាភិបាលម្នាក់បានប្រាប់សារព័ត៌មានថា ការបិទនឹងបន្ត «រហូតដល់មានការជូនដំណឹងបន្ថែម»។

មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះថា៖ «វា (បណ្ដាញ) នឹងត្រូវបានកាត់ផ្ដាច់ ដោយវានឹងកើតឡើងបន្តិចម្តងៗ នៅយប់នេះ។ មានសសរទូរគមនាគមន៍ពី ៨.០០០ ទៅ ៩.០០០ដើម ហើយវានឹងត្រូវបានផ្ដាច់។ មិនមានមធ្យោបាយ ឬប្រព័ន្ធផ្សេងទៀត ដើម្បីធ្វើទំនាក់ទំនងនោះទេ។ វិស័យធនាគារ គយ អ្វីៗទាំងអស់នៅទូទាំងប្រទេស នឹងរងផលប៉ះពាល់»។

គួរបញ្ជាក់ថា អាជ្ញាធរតាលីបង់របស់ប្រទេសអាហ្វហ្គានីស្ថាន បានចាប់ផ្តើមការបង្រ្កាបការចូលទៅប្រើប្រាស់ នៅដើមខែនេះ ដោយបានបិទប្រព័ន្ធអ៊ីនធឺណិតល្បឿនលឿនយ៉ាងមានប្រសិទ្ធភាព ក្នុងតំបន់មួយចំនួន។ កាលពីថ្ងៃទី១៦ ខែកញ្ញា អ្នកនាំពាក្យខេត្ត Balkh លោក Attaullah Zaid បានប្រាប់ថា ប្រព័ន្ធអ៊ីនធឺណិតខ្សែកាបអុបទិក ត្រូវបានហាមឃាត់ទាំងស្រុង នៅក្នុងខេត្តភាគខាងជើងមួយនេះ តាមបញ្ជារបស់មេដឹកនាំតាលីបង់។

នៅឆ្នាំ២០២៤ ទីក្រុងកាប៊ុលបានយកបណ្តាញខ្សែកាបអុបទិកប្រវែង ៩.៣៥០គីឡូម៉ែត្រ ដែលភាគច្រើនត្រូវបានសាងសង់ដោយអតីតរដ្ឋាភិបាលគាំទ្រដោយសហរដ្ឋអាមេរិក ជា «អាទិភាព» ដើម្បីនាំប្រទេសនេះខិតទៅជិតពិភពលោកទាំងមូល ហើយជួយឲ្យខ្លួនចេញពីភាពក្រីក្រ។ តែតាំងពីឡើងកាន់អំណាចមក ក្រុមតាលីបង់បានបង្កើតការរឹតបន្តឹងជាច្រើន ស្របតាមច្បាប់វិន័យរបស់សាសនាឥស្លាម៕