មនុស្ស ៣នាក់ ត្រូវបានសម្លាប់ ហើយមនុស្ស ៣៨នាក់ កំពុងបាត់ខ្លួនក្រោមគំនរបាក់បែកអគារនៅថ្ងៃអង្គារនេះ ក្រោយអគារស្ថិតក្រោមការសាងសង់នៅក្នុងបរិវេនសាលារៀនអ៊ិស្លាម Al Khoziny បានបាក់នៅខេត្តជ្វាខាងកើត ប្រទេសឥណ្ឌូនេស៊ីកាលពីរយៈពេល ១ថ្ងៃមុន ។

ទីភ្នាក់ងារកាត់បន្ថយគ្រោះមហន្តរាយនិយាយថា មនុស្សរាប់សិបនាក់ នាំគ្នាធ្វើពិធីបួងសួងនៅជាន់ផ្ទាល់ដីនៃអគារ ពេលដែលវាបាក់កាលពីរសៀលថ្ងៃចន្ទ ខណៈការងារសាងសង់កំពុងធ្វើឡើងនៅជាន់ទី ៤នៃសំណង់អគារដែលស្ថិតក្នុងទីក្រុង Sidoarjo ។

ពួកគេបន្តថា មនុស្សប្រហែល ១០០នាក់ ត្រូវបានជួយសង្រ្គោះ ក្នុងនោះមនុស្សរងរបួសជិត ៨០នាក់ ត្រូវបានបញ្ជូនទៅកាន់មន្ទីរពេទ្យ ។ ចំណែកឯគ្រឹះអគារ ទំនងជាមិនអាចទ្រទម្ងន់សំណង់អគារបាននៅជាន់ទី ៤ ។

លោក Mohammad Syafii គឺជាប្រធានទីភ្នាក់ងារជួយសង្រ្គោះ និងរុករកជាតិ និយាយថា គិតត្រឹមវេលាម៉ោង ១២ និង ៣០នាទីថ្ងៃត្រង់ ម៉ោងក្នុងស្រុក ថ្ងៃអង្គារនេះ ចំនួនជនរងគ្រោះមាន ១០២នាក់ មានអ្នករស់រាន ៩៩នាក់ ហើយមនុស្ស ៣នាក់ បានស្លាប់ ។

ដោយឡែក លោក Nanang Sigit ដែលជាមន្រ្តីជួយសង្រ្គោះនិងរុករកក្នុងស្រុក និយាយថា ក្រុមអាជ្ញាធរនឹងមិនប្រើប្រាស់គ្រឿងចក្រធុនធ្ងន់នោះទេ ដោយព្រួយបារម្ភខ្លាចថា សំណង់អគារនៅសល់អាចនឹងបាក់បន្ថែមទៀត ៕