តម្លៃមាសបានឡើងដល់កម្រិតខ្ពស់បំផុតមួយផ្សេងទៀត ដោយបន្តការហក់ឡើងកាលពីថ្ងៃចន្ទ (ទី២៩ ខែកញ្ញា) ខណៈដែលការរំពឹងទុកពីការបិទរដ្ឋាភិបាលអាមេរិកដែលកំពុងជិតកើតមាន បានផ្ដល់ជាភាពមិនប្រាកដប្រជាដល់គោលនយោបាយរូបិយវត្ថុរបស់ធនាគារកណ្តាលអាមេរិក នៅមុនមានការសម្រេចអំពីអត្រាការប្រាក់ នាខែក្រោយ។

មាសដុំបានហក់ឡើងរហូតដល់ ០,៩ភាគរយ ពោលគឺឡើងដល់តម្លៃខ្ពស់បំផុត ៣.៨៦៧,២៥ដុល្លារ ក្នុងមួយអោន ដោយបានលើសតម្លៃខ្ពស់បំផុតនៃការជួញដូរកាលពីមុន នៅពេលដែលវាឡើងទៅកៀកនឹងកម្រិត ២ភាគរយ។

ជំនួប រវាងបណ្ដាថ្នាក់ដឹកនាំជាន់ខ្ពស់សភា និងលោកប្រធានាធិបតី Donald Trump បានបញ្ចប់ទៅដោយគ្មានកិច្ចព្រមព្រៀងអ្វីឡើយ ជុំវិញការផ្តល់មូលនិធិរយៈពេលខ្លីរបស់រដ្ឋាភិបាល។ លទ្ធផលបែបនោះ គឺជាការជំរុញឲ្យមានក្ដីបារម្ភអំពីការបិទរដ្ឋាភិបាល ដែលអាចរារាំងដល់ការចេញផ្សាយរបាយការណ៍សេដ្ឋកិច្ច ពោលគឺមិនអាចផ្ដល់ឲ្យវិនិយោគិននូវទិន្នន័យសំខាន់ៗដែលត្រូវការ ដើម្បីវាយតម្លៃសេដ្ឋកិច្ចអាមេរិក។

គួរបញ្ជាក់ថា តម្លៃមាសបានឡើង ៤៧ភាគរយ នៅឆ្នាំនេះ ដែលជាការស្ថិតនៅលើផ្លូវឡើងខ្ពស់បំផុតប្រចាំឆ្នាំជាលើកដំបូង គិតចាប់តាំងពីឆ្នាំ១៩៧៩ ហើយបានហក់ឡើងខ្ពស់បំផុតជាបន្តបន្ទាប់ ដោយសារតម្រូវការរបស់ធនាគារកណ្តាល និងការចាប់ផ្ដើមឡើងវិញនូវការកាត់បន្ថយអត្រាការប្រាក់របស់ធនាគារកណ្ដាលអាមេរិក។ ហើយក្រុមហ៊ុន Goldman Sachs Group Inc. និង Deutsche Bank AG បានលើកឡើងដូចគ្នាថា ក្រុមហ៊ុនរំពឹងថា ការឡើងថ្លៃនេះនឹងបន្តមានទៀត៕