ប្រធានាធិបតីកូរ៉េខាងត្បូង លោក Lee Jae Myung នឹងធ្វើជាម្ចាស់ផ្ទះទទួលនាយករដ្ឋមន្ត្រីជិតផុតអាណត្តិរបស់ជប៉ុន គឺលោក Shigeru Ishiba នៅថ្ងៃអង្គារ (ទី៣០ ខែកញ្ញា) នេះ អំឡុងដំណើរទស្សនកិច្ចសុច្ឆន្ទៈ ក្នុងគោលបំណងបង្ហាញពីការប្តេជ្ញាចិត្តរបស់ប្រទេសទាំង២ ក្នុងការធ្វើឲ្យប្រសើរឡើងនូវទំនាក់ទំនងដែលធ្លាប់ជួបនឹងភាពអាប់អួ និងកិច្ចសហប្រតិបត្តិការយ៉ាងជិតស្និទ្ធ លើវិស័យពាណិជ្ជកម្ម។

លោក Lee បានធ្វើការជាមួយប្រទេសជប៉ុន ពាក់ព័ន្ធនឹងបញ្ហាសន្តិសុខ និងពាណិជ្ជកម្ម ដោយបន្តគោលនយោបាយរបស់អ្នកកាន់តំណែងមុនរបស់លោក ជុំវិញការរួបរួមគ្នាឡើងវិញយ៉ាងប្រុងប្រយ័ត្ន បន្ទាប់ពីមានភាពតានតឹងជាច្រើនឆ្នាំ ដោយសារបញ្ហាប្រវត្តិសាស្រ្តសម័យសង្រ្គាមរបស់ជប៉ុន។

លោក Ishiba ដែលគណបក្សប្រជាធិបតេយ្យសេរីនិយម (LDP) របស់លោក គ្រោងនឹងជ្រើសរើសមេដឹកនាំថ្មី នៅថ្ងៃទី៤ ខែតុលា ដែលទំនងជានឹងក្លាយជានាយករដ្ឋមន្ត្រីដែរនោះ គ្រោងនឹងធ្វើទស្សនកិច្ចនៅកូរ៉េខាងត្បូងរយៈពេល ២ថ្ងៃ ហើយជួបជាមួយលោក Lee នៅទីក្រុងប៊ូសានភាគខាងត្បូង។

នៅឯសន្និសីទសារព័ត៌មាន កាលពីថ្ងៃចន្ទ (ទី២៩ ខែកញ្ញា) ទីប្រឹក្សាសន្តិសុខជាតិរបស់លោក Lee គឺលោក Wi Sung-lac បានប្រាប់ថា លោក Ishiba គឺជាឥស្សរជនដ៏ពិសេសមួយរូប នៅក្នុងគណបក្សកាន់អំណាចរបស់ជប៉ុន ហើយកូរ៉េខាងត្បូង បានទន្ទឹងរង់ចាំការបន្តតួនាទីរបស់លោក ក្នុងការជួយដល់ទំនាក់ទំនងទ្វេភាគី បន្ទាប់ពីលោកបានប្រកាសលាលែងពីតំណែង។

ជាមួយគ្នានេះ លោក Wi បានបញ្ជាក់បន្ថែមថា មេដឹកនាំទាំង២ ក៏ត្រូវបានគេរំពឹងថា នឹងចែករំលែកនូវព័ត៌មាន អំពីការចរចាពាណិជ្ជកម្មរៀងៗខ្លួន ដោយមានគោលទទួលការទម្លាក់អត្រាពន្ធរបស់សហរដ្ឋអាមេរិក ដែលដាក់ដោយប្រធានាធិបតីអាមេរិក លោក Donald Trump។

គួរបញ្ជាក់ថា ជប៉ុនបានឈានដល់កិច្ចព្រមព្រៀងក្របខ័ណ្ឌមួយជាមួយលោក Trump ដែលបានចុះហត្ថលេខា លើក្រឹត្យ ដើម្បីបង្កើតកិច្ចព្រមព្រៀងកាត់បន្ថយពន្ធលើផលិតផលជប៉ុនមកត្រឹមកម្រិត ១៥ភាគរយក្នុងនោះរួមទាំងលើរថយន្តផងដែរ។ ចំណែកលោក Lee បានឈានដល់កិច្ចព្រមព្រៀងត្រឹមចាប់ដៃជាមួយលោក Trump ក្នុងអំឡុងពេលមានដំណើរទស្សនកិច្ច នៅទីក្រុងវ៉ាស៊ីនតោន កាលពីខែសីហា ប៉ុន្តែកិច្ចពិភាក្សាបន្ត ដើម្បីបញ្ចប់កិច្ចព្រមព្រៀងពាណិជ្ជកម្ម នៅតែជាប់គាំងដដែល ដែលភាគច្រើន ដោយសារព័ត៌មានលម្អិតនៃការវិនិយោគ ៣៥០ពាន់លានដុល្លារដែលត្រូវបានសន្យាដោយកូរ៉េខាងត្បូង៕