ប្រជាពលរដ្ឋនៅខេត្ត Nghe An ប្រទេសវៀតណាម នាំគ្នាដើរលុកទឹកត្រឹមចង្កេះនាថ្ងៃអង្គារនេះ ដើម្បីស្រោចស្រង់ទ្រព្យសម្បត្តិ និងនាំយករបស់របរប្រើប្រាស់ក្នុងផ្ទះទៅលើគោក ក្រោយព្យុះទីហ្វុង Bualoi បោកបក់ឆ្លងកាត់ ។

ផ្ទះជាច្រើនខ្នងបានរងការជន់លិចដោយអន្លើរ ក្នុងនោះគ្រឿងសង្ហារឹម និងរបស់របរប្រើប្រាស់ បានលិចក្នុងទឹកជំនន់ ។

អ្នកស្រី Ngo Thi Loan ជាពលរដ្ឋវ័យ ៥៦ឆ្នាំមួយរូបដែលអង្គុយលើគ្រែហ៊ុមព័ទ្ធដោយទឹកជំនន់ និយាយថា គាត់ពុំធ្លាប់ដែលជួបព្យុះបំផ្លិចបំផ្លាញបែបហ្នឹងពីមុននោះទេ ។ ដំបូលផ្ទះបានប៉ើងគ្មានសល់ ហើយកម្រិតទឹកជំនន់បានឡើងឥតឈប់ឈរចាប់តាំងពីម៉ោង ៣ព្រឹកទាបភ្លឺមកម្ល៉េះ ហើយបើសិនជាភ្លៀងមិនព្រមឈប់ធ្លាក់ទេនោះ ទឹកនឹងអាចឡើងដល់ដំបូលផ្ទះជាក់ជាពុំខាននោះឡើយ ។

អ្នកស្រី Ngo Thi Lan វ័យ ៥៤ឆ្នាំ ដែលជាពលរដ្ឋមួយរូបទៀតនិយាយថា គាត់ពិបាកណាស់ក្នុងការបោសសម្អាត ហើយសម្ភារៈក្នុងផ្ទះរបស់គាត់ទាំងអស់ បានលិចគ្មានសល់ ។ គាត់គ្មានកន្លែងយកចេញរបស់របរប្រើប្រាស់ទាំងអស់នេះឡើយ ។ វារាយប៉ាយគ្រប់ទីកន្លែង ។

រដ្ឋាភិបាលនិយាយនៅថ្ងៃអង្គារនេះថា ចំនួនមនុស្សស្លាប់ដោយសារព្យុះ Bualoi នៅប្រទេសវៀតណាម បានកើនឡើងដល់ ១៩នាក់ ក្នុងនោះមនុស្ស ២១នាក់ផ្សេងទៀត កំពុងបាត់ខ្លួន ធ្វើឲ្យវាក្លាយជាព្យុះបំផ្លិចបំផ្លាញខ្លាំងបំផុតវាយប្រហារប្រទេសមួយនេះ ក្នុងឆ្នាំនេះ ស្របពេលដែលភ្លៀងធ្លាក់ខ្លាំងបង្កឲ្យាមានការជន់លិចធ្ងន់ធ្ងរនៅទីក្រុងហាណូយ និងតាមបណ្តាខេត្តនៅភាគខាងជើងប្រទេស ។

ព្យុះ Bualoi បានបោកបក់ដល់ដីគោកកាលពីថ្ងៃចន្ទ នៅតំបន់ភាគកណ្តាលឈៀងខាងជើងប្រទេសវៀតណាម ដោយធ្វើឲ្យកើតមានរលកសមុទ្រធំៗ ខ្យល់បក់ខ្លាំង និងភ្លៀងធ្លាក់ខ្លាំង ។

រដ្ឋាភិបាលនិយាយថា មនុស្ស ៨៨នាក់ បានរងរបួសផងដែរ ក្នុងនោះផ្ទះសម្បែងប្រជាពលរដ្ឋ ១០ម៉ឺនខ្នង រងការខូចខាត ភាគច្រើននៅខេត្ត Nghe An និងខេត្ត Ha Tinh ហើយដីស្រែ-ចម្ការជាង ១ម៉ឺនហិចតា បានរងការជន់លិច ៕